چیئرمین پاکستان کرکٹ بورڈ (پی سی بی) رمیز راجہ نے ویسٹ انڈیز کے دورہ پاکستان کے لیے شائقین کی اسٹیڈیم میں اجازت سے متعلق نیشنل کمانڈ اینڈ آپریشن سینٹر (این سی او سی) سے امیدیں باندھ لیں۔
تفصیلات کے مطابق ویسٹ انڈیز کرکٹ ٹیم نے آئندہ ماہ پاکستان کا دورہ کرنے کی تصدیق کردی ہے، پی سی بی کے مطابق ویسٹ انڈین ٹیم کراچی میں تین ٹی ٹوئنٹی اور تین ون ڈے میچز کھیلنے کے لیے 9 دسمبر کو کراچی پہنچے گی۔
شیڈول کے مطابق 9 دسمبر کو ویسٹ انڈیز کرکٹ ٹیم کراچی پہنچے گی۔ 13، 14 اور 16 دسمبر کو ٹی ٹوئنٹی میچز ہوں گے جبکہ ون ڈے میچز 18، 20 اور 22 دسمبر کو ہوں گے۔
اپنے بیان میں چیئرمین پی سی بی رمیز راجہ کا کہنا ہے کہ ہوم سیریز کی منسوخی کے بعد فینز کو سنسنی خیز میچز دیکھنے کا موقع ملے گا۔
انہوں نے یہ بھی کہا کہ ویسٹ انڈیز پاکستان کی پسندیدہ ٹیم رہی ہے۔
ساتھ میں انہوں نے اس امید کا بھی اظہار کیا کہ این سی او سی تماشائیوں کو اسٹیڈیم میں داخلے کی اجازت دے گی۔
