دبئی(ویب ڈیسک) امارتی حکومت کے افسر نے اعلان کیا ہے کہ متحدہ عرب امارات نے خام خلیہ استعمال کرتے ہوئے کووڈ 19 انفیکشن کیلئے جدید اور امید افزاءعلاج تیار کرلیا ہے۔ یو اے ای کی وزارت امور خارجہ کی ڈائریکٹر ہند العطیہ کا ٹوئٹر پر کہنا تھا کہ اس وائرس کے خلاف عالمی جنگ میں یہ ایک گیم چینجر ہوسکتا ہے۔ انہوں نے اسے کووڈ 19 کیلئے بطور پیشرفت علاج (Breakthrough Treatment) قراردیا۔ ابوظہبی کے خام خلیے کے مرکز (اے ڈی ایس سی سی) نے ایک ایسا طریقہ علاج تیار کرلیا جو پھیپھڑوں کے خلیوں کو دوبارہ تیار کرتا ہے اور مدافعتی نظام کو زیادتی کرنے سے روکتا ہے۔ ہند العطیہ کا مزید کہنا تھا کہ علاج میں کسی مریض کے اپنے خون سے خام خلیوں کا عرق شامل ہے۔ یہ جدید علاج کورونا وائرس کے 73 مریضوں کو کرایا گیا تھا جن میں سے ہر ایک اس مرض سے مکمل طور پر ٹھیک ہوگیا ہے۔
