زرداری پر کمزوری کی وجہ سے رعشہ طاری‘ دل کے قریب خون کا لوتھڑا

اسلام آباد (مانیٹرنگ ڈیسک) پاکستان انسٹیٹیوٹ آف میڈیکل سائنسز (پمز) میں زیر علاج سابق صدر آصف علی زرداری کے دل کے وال میں کلاٹ (خون کا لوتھڑا) بن گیا ہے۔ سابق صدر آصف علی زرداری ایک ہفتے سے پمز ہسپتال اسلام آباد میں زیر علاج ہیں اور ڈاکٹروں کے مطابق ان کے پلیٹ لیٹس 1 لاکھ 35 ہزار تک پہنچ گئے ہیں۔ ڈاکٹروں کا کہنا ہے کہ سابق صدر کو کمزوری اور شوگر کی وجہ سے ہاتھوں میں کپکپاہٹ کی شکایت ہے جبکہ ان کے پرانے اسسٹنٹ کی وجہ سے دل کے وال میں کلاٹ بھی پیدا ہو گیا ہے۔ ہسپتال ذرائع کے مطابق ڈاکٹروں نے آصف علی زرداری کے لیے تھیلیئم اسکین کو لازمی قرار دیا ہے اور آصف زرداری کو تمام ٹیسٹ کلیئر ہونے تک اسپتال میں رکھے جانے کا امکان ہے۔ نیب راولپنڈی کی حراست میں موجود پاکستان پیپلز پارٹی کے شریک چیئرمین آصف زرداری کو 23 اکتوبر کی رات کمر اور گردن کی تکلیف کے باعث پمز اسپتال میں داخل کیا گیا تھا۔ آصف زرداری کو ڈپریشن، جسمانی کمزوری، گردن اور مہروں میں شدید درد کی بھی شکایت ہے۔ اس کے علاوہ ان کے غدود میں غیر معمولی اضافے کی تشخیص بھی ہوئی ہے جسے خطرناک قرار دیا گیا ہے۔ پمز ہسپتال میں آصف علی زرداری کے وارڈ کو ہی سب جیل کا درجہ دیا گیا ہے۔ واضح رہے کہ سابق صدر اور ان کی بہن فریال تالپور جعلی اکانٹس کیس میں قومی احتساب بیورو(نیب) راولپنڈی کی حراست میں ہیں۔