فیصل جاوید کا’شکریہ‘ نے مریم کی آنکھیں کھول دیں

لاہور(ویب ڈیسک)سینیٹر فیصل جاوید نے ن لیگ دور حکومت کے مالی نظام سے متعلق رپورٹ پوسٹ کرنے پر مریم نواز کا شکریہ ادا کردیا تاہم کچھ ہی دیر بعد مریم نواز نے اپنی ٹویٹ ڈیلیٹ کر دی۔مریم نواز نے اپنی ٹویٹ میں اخباری تراشے لگاتے ہوئے لکھا تھا کہ نالائقوں اور نااہلوں کی اصل کارکردگی۔مریم نواز کی جانب سے ٹویٹ کی گئی رپورٹس کے مطابق ورلڈ بینک کا کہنا ہےکہ پاکستان کا بجٹ اپنی ساکھ کھوچکا، ن لیگ دور کے منفی اشاریے پی ٹی آئی دور میں بھی برقرار ہیں۔مذکورہ اخباری تراشوں میں ورلڈ بینک کی رپورٹ میں ن لیگ دور کے تین سال کا 2012 سے موازنہ کیا گیا تھا۔فیصل جاوید نے مریم نواز کے پیغام کو ری ٹویٹ کرتے ہوئے لکھا کہ ” بہت خوب، تاریخ کی بدترین کارکردگی سامنے لانے پر مریم تعریف کی مستحق ہیں، ہم تو کہتے آئے تھے آج آپ نے بھی مان لی۔”اس کے کچھ ہی دیر بعد مریم نواز نے ٹویٹ ڈیلیٹ کی تو فیصل جاوید نے پھر لکھا کہ ٹویٹ ڈیلیٹ کرنے کی ضرورت نہیں، آپ نے جو کیا اس پر شرمندہ نہ ہوں۔فیصل جاوید نے طنزیہ انداز میں لکھا کہ آپ کو سچ بتاتے ہوئے فخر محسوس کرنا چاہیے۔