پاکستان تحریک انصاف کی جدوجہد کرپشن کے خلاف ہے جبکہ اپوزیشن کا احتجاج اپنی کرپشن چھپانے کے لئے ہے: میاں اسلم اقبال

لاہور(صدف نعیم سے)صوبائی وزیر اطلاعات وثقافت میاں اسلم اقبال نے کہا ہے کہ پاکستان تحریک انصاف کی جدوجہد کرپشن کے خلاف ہے جبکہ اپوزیشن کا احتجاج اپنی کرپشن چھپانے کے لئے ہے۔اپوزیشن کو جمہوریت اور عوام کا کوئی درد نہیں بلکہ اپنی لوٹی ہوئی دولت بچانے کے لئے ان کے پیٹ میں مروڑ اٹھ رہے ہیں۔وزیراعظم عمران خان کرپشن کے خاتمے کے لئے جہاد کررہے ہیں جس سے لوٹ مار کرنے والے قبیلے کی پریشانی بڑھ رہی ہے۔یہ عناصر یاد رکھیں ملک میں افراتفری،شورشرابہ اور احتجاج کے ذریعے کرپشن اب چھپائی نہیں جا سکتی۔کرپٹ ٹولے کو حساب دینا ہو گا،قومی دولٹ لوٹنے والوں سے ایک ایک پائی کی وصولی ہر پاکستانی کے دل کی آواز ہے۔صوبائی وزیر نے ان خیالات کا اظہار آج اپنے کیمپ آفس میں پارٹی کارکنوں کے ایک وفد سے گفتگو کرتے ہوئے کیا۔صوبائی وزیر نے کہا کہ وزیراعظم عمران خان ایک خوددار اور جرات مند لیڈر ہیں جنہوں نے ملکی مفادات پر دو ٹوک اور واضح موقف اختیار کیا۔مسئلہ کشمیر کو اس انداز میں اجاگر کرنا عمران خان کا ہی کریڈٹ ہے۔پاکستان نے بھارت کو نا ک آو¿ٹ کر دیا اب اس دیرینہ مسئلے کا حل نکالنا ہو گا۔امریکی صدر سے ملاقات کے دوران عمران خان کے قومی لباس اور باڈی لینگوئج نے عوام کے دل جیت لیے ہیں۔وزیراعظم 22کروڑ عوام کی توقعات پر پورا ترے ہیں،ثابت ہوا کہ شخصیت سچی ہوتو پرچیوں کی ضرورت نہیں رہتی۔انہوں نے کہا کہ عالمی میڈیا نے عمران خان کے دورہ امریکہ کو انتہائی اہمیت دی ہے۔خارجہ محاذ پر پاکستان نے تیزی سے کامیابیاں حاصل کی ہیں۔انہوں نے وزیراعظم کی امریکی صدر سے بامقصد بات چیت اہمیت کی حامل ہے اور ان کا امریکہ میں شاندار استقبال قابل فخر ہے۔ صوبائی وزیر نے کہا کہ وزیراعظم عمران خان کی قیادت میں نئے پاکستان کے قیام کی جانب تیزی سے بڑھ رہے ہیں۔نئے پاکستان میں ہر قیدی کے ساتھ ایک جیسا سلوک ہو گا،کوئی وی آئی پی قیدی نہیں ہو گا۔انہوں نے کہا کہ اب شور مچانے سے کوئی چور بچ نہیں سکے گا،جوابدہی ہو کر رہے گی۔صوبائی وزیر نے کہا کہ عمران خان کی پذیرائی،سفارتی محاذ پر کامیابیوں سے دلبرداشتہ ہو کر اپوزیشن بوکھلاہٹ کا شکا رہے۔