لندن(ویب ڈیسک) برطانیہ میں کچھ نوجوان لڑکے لڑکیوں نے ایک اسلامی سکول پر حملہ کر دیا اورتوڑ پھوڑ کرنے کے ساتھ بدبختوں نے کئی قرآن مجید بھی شہید کر ڈالے، جس پر انہیں گرفتار کر لیا گیا ہے۔ دی میٹرو کے مطابق یہ حملہ برطانوی شہر نیوکاسل میں واقع بحر اکیڈمی نامی اسلامی سکول پر کیا گیا۔ حملہ کرنے والوں میں ایک 18سالہ لڑکی، دو 16سالہ لڑکے، ایک 14سالہ لڑکا اور ایک 14سالہ لڑکی شامل تھے اور یہ تمام اس وقت پولیس کی حراست میں ہیں۔نارتھ امبریا پولیس کے ایریا انسپکٹر کا کہنا تھا کہ ”یہ ایک افسوسناک واقعہ تھا جو بحر اکیڈمی کے اراکین کے لیے شدید ذہنی اذیت کا سبب بنا۔ رواں سال میں اس سکول پر اس نوعیت کا یہ دوسرا واقعہ ہے۔ ہم اس واقعے کو مسلمانوں کے خلاف نفرت کے جرم کے طور پر دیکھ رہے ہیں۔ہم جانتے ہیں کہ اس طرح کے واقعات کمیونٹی پر سنگین نوعیت کے اثرات مرتب کر تے ہیں اور میں لوگوں کو واضح کرنا چاہتا ہوں کہ ایسے واقعات قطعاً ناقابل قبول ہیں۔“واضح رہے کہ اس سے قبل جنوری میں بھی اس اسلامی سکول پر حملہ کیا گیا تھا اور اسی طرح توڑ پھوڑ اور قرآن مجید کی بے حرمتی کی گئی تھی۔
