وزیر اعظم کا سانحہ ساہیوال پر جوڈیشل کمیشن بنانے کا عندیہ

لاہور(ویب ڈیسک) وزیراعظم عمران خان نے سانحہ ساہیوال پر جوڈیشل کمیشن بنانے کا عندیہ دے دیا۔وزیراعظم عمران خان ایک روزہ دورے پر لاہور پہنچے جہاں ان سے وزیر اعلیٰ پنجاب عثمان بزدار نے ملاقات کی اور سانحہ ساہیوال کی تحقیقات میں پیش رفت سے آگاہ کیا۔بعدازاں وزیراعظم کی زیر صدارت اعلیٰ سطح کا اجلاس ہوا جس میں وفاقی وزیر اطلاعات فواد حسین، وزیر اورسیز پاکستانیز سید ذوالفقار بخاری ، وزیر صحت ڈاکٹر عامر کیانی ، معاون خصوصی نعیم الحق، پنجاب کے سینئر وزیر علیم خان ، وزیر زراعت ملک نعمان لنگڑیال، وزیر خزانہ مخدوم ہاشم جوان بخت، وزیر ہاو?سنگ میاں محمود الرشید، وزیر آبپاشی محمّد محسن لنگڑیال، وزیر صنعت میاں محمد اسلم اقبال اور سینئر افسران نے شرکت کی۔اجلاس میں پنجاب میں امن و امان کی صورتحال پر تفصیلی بات چیت کی گئی اور وزیراعلیٰ عثمان بزدار نے وزیراعظم کو پولیس اصلاحات کے بارے میں بریفنگ بھی دی۔وزیر اعظم عمران خان نے سانحہ ساہیوال ہر جوڈیشل کمیشن بنانے کا عندیہ دیتے ہوئے عثمان بزدار کو سانحہ ساہیوال کے متاثرہ خاندان سے ملاقات کی ہدایت کی۔ عمران خان نے کہا کہ متاثرہ خاندان کی بات سنی جائے اور اگر وہ لوگ جوڈیشل کمیشن پر مطمئن ہوتے ہیں تو اس پر غور کیا جائے۔وزیراعظم نے سانحہ ساہیوال کے متاثرہ خاندان میں ایک کینسر زدہ مریض کے علاج کی بھی ہدایت کرتے ہوئے کہا کہ پولیس کا اس فیملی کے ساتھ رویہ بھی مانیٹر کیا جائے۔وزیراعلی پنجاب کل پیر کو سانحہ ساہیوال کی متاثرہ فیملی سے ملاقات کرینگے۔
واٹر اتھارٹی کے قیام کی منظوری
اجلاس میں وزیراعظم نے پنجاب میں صاف پانی کی فراہمی کے لیے واٹر اتھارٹی کے قیام کی اصولی منظوری دیتے ہوئے جلد قانون سازی کرنے کی بھی ہدایت کی۔
گیس قیمتوں میں اضافے کا نوٹس
اجلاس میں وزیراعظم عمران خان نے گیس کی قیمتوں میں اضافے کا نوٹس لیتے ہوئے وزیر پیٹرولیم کو فوری طور پر تحقیقات کی ہدایت کردی ہیں۔
پنجاب کا انتظامی ڈھانچہ تبدیل کرنے کا فیصلہ
اجلاس میں پنجاب حکومت کی انتظامی اور مالی استعداد کار بڑھانے پر بھی غور کیا گیا اور صوبے کا انتظامی ڈھانچہ تبدیل کرنے کا فیصلہ کیا گیا۔وزیراعظم نے پنجاب اسپیشل اسٹرٹیجی کی منظوری دیتے ہوئے کہا کہ عوام کی فلاح کے لیے انتظامی ڈھانچے کی تنظیم نو کی اشد ضرورت ہے اور وفاقی حکومت اس سلسلے میں ہر ممکن مدد فراہم کرے گی۔
یہ بھی طے ہوا کہ پنجاب میں سینئر بیوروکریٹس کو اہم وزارتوں کی ذمہ داری دی جائے گی جن کے ذریعے اہم فیصلے کیے جائیں گے، مختلف وزارتوں کو رابطہ نیٹ ورک کے ذریعے منسلک کیا جائیگا جن کی سربراہی بھی سرکاری افسران کریں گے۔ماہر معاشیات ڈاکٹر سلمان شاہ نے بریفنگ دیتے ہوئے کہا کہ پنجاب میں زراعت اور صنعتی پیداوار میں مصنوعات کے تنوع کی ضرورت ہے۔ انہوں نے صوبے کے 50 شہروں اور 36 اضلاع کی ترقی کے لیے تجاویز بھی پیش کیں اور کم سے کم 15 شہروں کو معاشی حب قرار دینے کی سفارش کی۔
میڈیا حکمت عملی
علاوہ ازیں وزیراعظم عمران خان کی زیر صدارت میڈیا اسٹریٹجک کمیٹی کا اجلاس بھی ہوا جس میں وزیراعظم نے میڈیا کے ساتھ روابط کو مضبوط بنانے کی ہدایت کرتے ہوئے کہا کہ میڈیا کو عوام کی فلاح و بہبود کے حوالے سے جاری منصوبوں سے آگاہ کیا جائے اور میڈیا میں موثر انداز میں حکومت کا دفاع کیا جائے۔