سرفراز لگا تار 11ویں سیریز جیتنے کیلئے پر عزم ،کیویز سے دوسرا ٹی 20معرکہ آج

دبئی (اے پی پی) پاکستان اور نیوزی لینڈ کی کرکٹ ٹیموں کے درمیان تین ٹی ٹونٹی میچوں پر مشتمل سیریز کا دوسرا میچ آج دبئی میں کھیلا جائیگا۔میچ پاکستانی وقت کے مطابق رات 9بجے شروع ہوگا۔میچ میں کامیابی کی صورت میں گرین شرٹس لگاتار 11ٹی 20سیریزجیتنے والی ٹیم بن جائے گی۔ پاکستان کو کیویز کے خلاف تین میچوں کی سیریز میں 1-0 کی برتری حاصل ہے۔ پاکستان نے نیوزی لینڈ کی ٹیم کو پہلے ٹی ٹونٹی کرکٹ میچ میں 2 رنز سے شکست دی تھی۔ اس سے قبل پاکستان کی ٹیم نے کینگروز کو تین ٹی ٹونٹی میچوں کی سیریز میں کلین سوئپ کیا تھا۔ یوں پاکستان کی ٹی ٹونٹی میچوں میں مسلسل فتوحات کی تعداد سات ہوگئی ہے۔ پاکستان ٹیم کے کپتان سرفراز احمد نے کیویز کے خلاف پہلے میچ میں کامیابی کو ٹیم کی اجتماعی کوششوں کا نتیجہ قرار دیا ہے۔ انہوں کہا ہے کہ انکی ٹیم مکمل طور پر فٹ ہے اور کیویز کو دوسرے میچ میں بھی شکست دیکر سیریز 2-0 سے اپنے نام کریگی۔ ادھر کیویز ٹیم کے قائد کا کہنا ہے کہ پہلے میچ میں شکست سے دلبرداشتہ نہیں ہوئے ہیں۔ انہوں نے کہا کہ دوسرے میچ میں پاکستان کے خلاف جاندار کم بیک کریں گے۔ دونوں ٹیموں کے کپتانوں نے دوسرے میچ میں کامیابی کے لئے بیانات دیئے ہیں اور اس اعتبار سے توقع کی جا رہی ہے کہ دونوں ٹیموں کے درمیان سیریز کا دوسرا میچ کانٹے دار ہوگا اور شائقین کرکٹ کو اچھا میچ دیکھنے کو ملے گا۔ واضح رہے کہ دونوں ٹیموں کے درمیان سیریز کا تیسرا اور آخری ٹی ٹونٹی میچ 4 نومبر کو دبئی میں کھیلا جائیگا۔ تینوں ٹی ٹونٹی میچز نائٹ ہونگے اور پاکستان کے معیاری وقت کے مطابق رات نو بجے شروع ہوں گے۔ دونوں ٹیموں کے درمیان تین ٹی ٹونٹی میچوں کی سیریز کے بعد تین ایک روزہ بین الاقوامی میچوں کی سیریز کے علاوہ تین ٹیسٹ میچوں کی سیریز بھی کھیلی جائیگی۔