کراچی (ویب ڈیسک)امن و امان کی صورتحال خراب ہونے کے پیش نظر پنجاب، بلوچستان، کے پی کے سمیت کراچی میں تعلیمی ادارے بند رکھنے کا اعلان کردیا گیا۔ذرائع کے مطابق آسیہ بی بی کیس کے حوالے سے احتجاج کل تیسرے روز بھی جاری رہنے کا امکان ہے جس کے باعث ملک کے مختلف شہروں میں تعلیمی ادارے بند رہیں گے۔پنجاب حکومت نے صوبے بھر میں تمام اسکولز اور کالجز بند رکھنے کا اعلان کیا ہے اور اس حوالے سے نوٹی فکیشن بھی جاری کردیا ہے۔سندھ میں تعلیمی صورتحال کے حوالے سے مشیر اطلاعات سندھ بیرسٹر مرتضیٰ وہاب نے ٹویٹر پر بتایا کہ سندھ حکومت نے جمعے کو کراچی میں تعلیمی ادارے بند رکھنے کا فیصلہ کیا ہے تاہم صوبے کے دیگر اضلاع میں اسکولز معمول کے مطابق کھلے رہیں گے۔اسی طرح بلوچستان کے محکمہ تعلیم کے مطابق صوبے بھر میں تمام سرکاری اور نجی اسکولز بند رہیں گے جب کہ خیبرپختون خوا ہ میں تمام نجی اسکولوں کی جانب سے تعطیل کا اعلان کیا گیا ہے۔
