سرفراز احمد کی کپتانی سے چھٹی کا امکان

ابوظہبی (ویب ڈیسک) سرفراز احمد کی کپتانی سے چھٹی کا امکان، پی سی بی کرکٹ کمیٹی کے سربراہ محسن حسن خان نے ٹیسٹ ٹیم کی کپتانی کو سرفراز احمد پر اضافی بوجھ قرار دے دیا۔ تفصیلات کے مطابق تینوں فارمیٹ میں قومی کرکٹ ٹیم کے کپتان سرفراز احمد کی ٹیسٹ ٹیم کی کپتانی سے چھٹی ہونے کا امکان پیدا ہو گیا ہے۔حال ہی میں پاکستان کرکٹ بورڈ کی تشکیل دی گئی کرکٹ کمیٹی کے تعینات کیے گئے سربراہ محسن حسن خان نے سرفراز احمد کو ٹیسٹ ٹیم کا کپتان برقرار رکھنے کی مخالفت کردی ہے۔ محسن حسن خان نے ٹیسٹ ٹیم کی کپتانی کو سرفراز احمد پر اضافی بوجھ قرار دے دیا ہے۔ محسن حسن خان کے اس بیان کے کرکٹ کے ماہرین کا کہنا ہے کہ یہ بیان معمولی نوعیت کا نہیں ہے۔بظاہر یوں معلوم ہوتا ہے کہ پاکستان کرکٹ بورڈ سرفراز احمد کو دی گئی ذمہ داریوں کا بوجھ کسی حد تک کم کرنے کا ارادہ رکھتا ہے۔ اسی سلسلے میں سرفراز احمد سے ٹیسٹ ٹیم کی کپتانی واپس لی جا سکتی ہے۔ یہاں یہ بات بھی واضح رہے کہ سرفراز احمد کی ٹیسٹ فارمیٹ میں کپتانی کے نتائج کچھ زیادہ متاثر کن نہیں ہیں۔ سرفراز احمد پاکستان کے وہ پہلے اور واحد کپتان ہیں جنہوں نے متحدہ عرب امارات میں کسی ٹیم کیخلاف ٹیسٹ سیریز میں ناصرف شکست کھائی، بلکہ کلین سوئپ کا بھی سامنا کرنا پڑا۔