ایران کہتا ہے پاکستان سے لوگ آکر کارروائی کرتے ہیں: رستم شاہ مہمند ، حکومتی اداروں کے کام نہ کرنے سے عدالتوں کو مداخلت کرنا پڑتی ہے: وسیم سجاد ، مسائل حل کرنے کیلئے سب کو مل کر بیٹھنا پڑے گا: نوید قمر کی چینل ۵ کے پروگرام ” نیوز ایٹ 7“ میں گفتگو

اسلام آباد(مانیٹرنگ ڈیسک)سابق سینیٹر و ماہر قانون وسیم سجاد نے کہا ہے کہ عدالتیں اس وقت مداخلت کرتی ہیں جب وہ سمجھتی ہیں کہ حکومتی ادارے کام نہیں کر رہے۔ڈیم بنانا،ہسپتالوں کے دورے،پانی کے مسائل حکومت کے حل کرنے کے ہیں لیکن جب حکومتیں یہ نہ کریں تو عدالتیں مجبورا کرتی ہیں لیکن بہرحال حکومت اپنا کام کرے گی گورننس بہتر ہوجائے گی تو اس کے بعد عدالتیں مداخلت کرنا چھوڑ دیں گی۔چینل فائیو کے پروگرام نیوز ایٹ7میں گفتگوکرتے ہوئے انہوں نے کہا کہ عدلیہ کا فیصلہ پبلک پراپرٹی ہوتا ہے ۔جب تمام ادارے اپنا کام کرنا شروع کردیں گی تو عدالتیں پیچھے ہٹ جائیںگی۔سابق سفیر رستم شاہ مہمند نے کہا ہے کہ ایران کہہ رہا ہے ان کے علاقے میں پاکستان سے لوگ آ کر کارروائیاں کرتے ہیں ۔پاکستان سعودی کے قریب ہو رہا ہے اس کے بعد سے ایران اور پاکستان کے درمیان دوریاں پیدا ہو رہی ہیں۔ایران سمجھتا ہے پاکستان کا بارڈر کنٹرول بہت کمزور ہے۔ایران اور افغانستان کا کیس ایک سا نہیں افغانستان اپنی غلطیوں کی ذمہ داری بھی پاکستان پر ڈال دیتا ہے۔پیپلز پا رٹی کے رہنما نوید قمر نے کہا کہ پاکستان کی معیشت پر ایک بحث شروع ہے پاکستان کو مسائل سے نکلنے میں وقت لگے گا لیکن جب تک سب مل کر نہیں بیٹھیں گے حل نہیں نکلے گا۔زرداری نے اسی پیرائے میں بات کی ہے۔حکومت غلط کام کرے گی تو اسے ٹف ٹائم ملے گا۔سب چاہتے ہیں عوام کو ریلیف ملے۔حکومت کو اپوزیشن کے ساتھ چلنا چاہئے۔