کھٹمنڈو (اے پی پی) ساف انڈر 15 فٹ بال چیمپئن شپ کی سیمی فائنل لائن اپ مکمل ہو گئی، لاسٹ فور مقابلے آج) کھیلے جائینگے۔ پاکستانی ٹیم کو میزبان نیپال کا چیلنج درپیش ہوگا۔ تفصیلات کے مطابق نیپال میں جاری ایونٹ اختتامی مراحل کی طرف گامزن ہے اور چار ٹاپ ٹیموں پاکستان، نیپال، بنگلہ دیش اور بھارت نے شاندار کھیل کی بدولت سیمی فائنل میں جگہ بنا رکھی ہے۔ پاکستانی ٹیم ایونٹ میں اب تک ناقابل شکست ہے اور اس نے روایتی حریف بھارت اور بھوٹان کو شکست فاش سے دوچار کرتے ہوئے سیمی فائنل تک رسائی حاصل کی تھی۔ ایونٹ کے دونوں سیمی فائنلز آج کھیلے جائیں گے۔ پاکستان کا مقابلہ نیپال اور بنگلہ دیش کا مقابلہ بھارت سے ہوگا۔ واضح رہے کہ دو ٹاپ ٹیموں کے درمیان فائنل 3 نومبر کو کھیلا جائے گا۔