لاہور (مانیٹرنگ ڈیسک) ایڈیٹر خبریں گروپ امتنان شاہد نے کہا ہے کہ پنجاب پولیس کی حالت بہت دگرگوں ہے، اس کی کارکردگی کی صورتحال یہ ہے کہ آئی جی ایسے چابی دیتا ہے اور یہ اس کے مطابق گھومنے لگتی ہے۔ آئین و قانون کے بجائے کسی کی ذاتی خواہشات پر چلنا پنجاب پولیس کا وطیرہ بن چکا ہے۔ نجی ٹی وی سے گفتگو کرتے ہوئے انہوں نے کہا کہ اس پولیس نظام کے بارے میں کیا بات کی جا سکتی ہے جس کا سارا نظام ایک محرر کے گرد گھومتا ہے۔ محرر جس طرح سے چاہتا ہے کیس کا چلاتا ہے۔ میرے گورنمنٹ کالج کے 3 دوست صرف اس لئے پولیس کی ملازمت کو خیرآباد کہنے پر مجبور ہو گئے کہ ان کے افسران ان سے خوش نہ تھے۔ ہم سب خوب آگاہ ہیں پولیس کے اس فرسودہ سسٹم سے جو صرف ایک محرر کے گرد گھومتا ہے، حالات کا تقاضا ہے کہ پولیس نظام میں اصلاحات لائی جائیں تا کہ یہ فورس حقیقی معنوں میں عوام کے جان و مال کی محافظ بن جائے۔ مبشر لقمان نے کہا کہ پہلے ہی پولیس کے ہاتھوں کسی کی عزت، جان و مال محفوظ نہیں تھی، رہی سہی کسر شہباز شریف کی ڈولفن فورس نے نکال دی۔