فیصلہ حکمرانوں کی مرضی کا نہ ہُوا تو کیا ہوگا؟؟طاہر القادری کا دبنگ اعلان

اسلام آباد(آئی این پی) عوامی تحریک کے سربراہ ڈاکٹر محمد طاہر القادری نے کہا ہے کہ جن کی اوقات فقط ایک عدد اقامہ تھی وہ تین تین بار وزیراعظم بن گئے ،نظام نہ بدلا تو کونسلر سطح کے لوگ ملکی دولت اور وقار سے کھیلتے رہیں گے،پاناما کیس میں فیصلہ مرضی کے برعکس آنے پر حکمران توڑ پھوڑ اور بد امنی پھیلاا سکتے ہیں،ماڈل ٹاﺅن میں قتل و غارت گری کے بعد شریف برادران کے حوصلے بڑھ گئے،بلا تفریق احتساب کا یہ نادر موقع کھو دیا گیا تو پھر انصاف اور سلامتی کے وہ ادارے جو آج کچھ نہ کچھ کرنے کی ہمت رکھتے ہیں کل کو اس سے بھی محروم کر دئیے جائینگے ۔اربوں کے ترقیاتی منصوبوں میں کرپشن بھی اربوں میں ہے ،ملک ایسے چلتے ہیں؟ اسلام آباد میڈےا سیل کے مطابق وہ گزشتہ روز پاکستان عوامی تحریک یوتھ ونگ، ویمن لیگ، ایم ایس ایم کے مرکزی رہنماﺅں سے ٹیلیفونک خطاب کررہے تھے۔ ڈاکٹر طاہر القادری نے کہا کہ تحریک منہاج القرآن اور عوامی تحریک کی یوتھ نے جان ہتھیلی پر رکھ کر موجودہ لوٹ مار کے نظام کو چیلنج اور ایکسپوز کیا، آج دنیا بھر سے اس لٹیرے نظام کے سرپرستوں کے خلاف گواہیاں آرہی ہیں، انہوں نے کہا کہ پاکستان جیسا غریب ملک جس کا ہر شہری آج ایک لاکھ روپے سے زائد کا مقروض ہے اس ملک کے ہر ترقیاتی اور توانائی کے منصوبے میں اربوں کی کرپشن پکڑی جارہی ہے مگر کسی کا کچھ نہیں بگڑتا کیونکہ اداروں میں خاندانی غلامی کا حلف اٹھانے والے بٹھائے گئے ہیں، انہوں نے کہا کہ ظفر حجازی کو عبرتناک سزا دے کر بقیہ کیلئے مثال بنایا جائے۔ انہوں نے کہا کہ گزشتہ روز پبلک اکاﺅنٹس کمیٹی نے اقرار کیا کہ اسلام آباد نیو ایئرپورٹ منصوبہ 35ارب کا تھا بڑھ کر108 ارب کا ہو گیا،اسی طرح نندی پور منصوبہ 35ارب کا تھا 58ارب میں مکمل ہوا، نیلم جہلم پراجیکٹ 167 ملین ڈالر کا تھا بڑھ کر 5ارب ڈالر کا ہو گیا، سڑکوں کی تعمیر کے درجنوں ایسے منصوبے ہر سال پکڑے جاتے ہیں جن کی ادائیگیاں ہو جاتی ہیں مگر ان منصوبوں کا زمین پر وجود نہیں ہوتا۔