جرنیل،ججزاور سیاستدان نیا عمرانی معاہدہ کریں،شہبازشریف

لاہور (پ ر) وزیراعلیٰ پنجاب محمد شہباز شریف نے ایکسپو سنٹرمیں یوم قائداعظم کے حوالے سے ”قائد کا خواب تعبیر بنا پنجاب“ کے موضوع پر منعقدہ خصوصی تقریب میں مہمان خصوصی کی حیثیت سے شرکت کی۔ بانی پاکستان قائداعظم محمد علی جناح کی عظیم خدمات کو زبردست انداز میں خراج عقیدت پیش کیا گیا۔ مختلف ممالک کے سفارتکاروں، صوبائی وزرائ، اراکین اسمبلی، صنعتکاروں، تاجروں اور مختلف شعبہ ہائے زندگی سے تعلق رکھنے والے افراد نے بڑی تعداد میں شرکت کی۔ وزیراعلیٰ پنجاب محمد شہبازشریف نے تقریب سے خطاب کرتے ہوئے کہا کہ قائداعظم محمد علی جناح کی قیادت میں بر صغیر کے مسلمانوں نے عظیم جدوجہد کی، جس کے نتیجے میں ہمیں آزاد خطہ نصیب ہوا اور آج ہم یہاں بانی پاکستان بابائے قوم قائد اعظم محمد علی جناح کو خراج عقیدت پیش کرنے کے لئے اکٹھے ہوئے ہیں۔ ہمیں اس بات کا بھی جائزہ لینا ہوگا کہ ہم نے قائد کی فرمودات پر کہاں تک عمل کیا اور قیام پاکستان کے مقاصد کے حصول میں کہاں تک کامیاب ہوئے ہیں؟۔ انہوں نے کہاکہ قائداعظم محمد علی جناح کی قیادت میں قیام پاکستان کے حصول کے لئے انتھک محنت ، جہدوجہد کی گئی اور لازوال قربانیاں دی گئیں۔ لاکھوں لوگ بھارت سے پاکستان اس لئے ہجرت کر کے آئے کہ وہ آزاد خطے میں عزت وقار کے ساتھ رہیں گے۔ جہاں قانون کی حکمرانی، انصاف کا بول بالا اور میرٹ کی بالادستی ہوگی اور سب کو آگے بڑھنے کے یکساں مواقع حاصل ہوں گے۔ انہوں نے کہاکہ 23مارچ 1940کو لاہور میں قیام پاکستان کی تاریخی قرارداد منظور ہوئی او راس موقع پر سندھی، پٹھان، پنجابی، بلوچ، شیعہ، سنی اور ہر مکتبہ فکر کے ا فراد ایک مقصد کے حصول کے لئے کندھے سے کندھا ملا کر کھڑے ہوئے اور اس اجلاس میں بھارت کے ایسے علاقوں سے بھی لوگ آئے جو پاکستان کا حصہ نہیں بنے، یہ وہ جذبہ تھا جو ہمارے آباﺅاجداد نے قیام پاکستان کے وقت دکھایا اور قیام پاکستان کے مقاصد کے حصول کےلئے بھی ہمیں اسی جذبے سے کام کرنا ہو گا۔ ہمارے آباﺅ اجداد نے اپنے گھر بار اس لئے چھوڑے تھے اور جانوں کی قربانیاں دیں تھی کہ وہ ایک علیحدہ وطن میں باوقار طریقے سے نئی زندگی کا آغاز کریں گے۔ ہمیں اپنا محاسبہ کرنا ہے کہ گزشتہ 70سالو ںمیں ہم نے کہاں تک قیام پاکستان کے مقاصد حاصل کئے ہیں۔ انہوںنے کہاکہ پاکستانی قوم بڑی بہادر ہے اور اس نے چیلنجز اور بحرانوں کا مقابلہ بڑی بہادری سے کیاہے۔ ملک کو بدترین سیلاب او ر زلزلوں کا سامنا بھی کرنا پڑا ہے او ران قدرتی آفات سے بے پناہ مالی و جانی نقصان اٹھانا پڑا ہے تاہم قوم نے ان بحرانوں کے دوران مثالی اتحاداور یکجہتی کا مظاہرہ کیا اور ملک کو بحرانوں سے نکالا۔ انہوں نے کہاکہ جب ہمسایہ ملک نے نیوکلیئر میزائل بنائے تو ہماری قوم نے بھی اپنے دفاع کو مضبوط بنانے کے لئے جرات مندانہ فیصلے کئے۔ آج پاکستان نیوکلیئر طاقت ہے اور دشمن ہماری طرف میلی آنکھ سے نہیں دیکھ سکتا۔ انہوںنے کہاکہ ہم دفاعی طور پر مضبوط ہیں لیکن معاشی میدان میں پیچھے رہ گئے ہیں۔ وہ ممالک جو ہم سے پیچھے تھے وہ آگے نکل گئے ہیں۔ 1960کی دہائی میں جنوبی کوریا پاکستان سے پیچھے تھا آج ہم سے آگے ہے، بنگلہ دیش جسے بوجھ سمجھا جاتا تھا اس کی برآمدات پاکستان سے زیادہ ہیں۔ اللہ تعالیٰ نے پاکستان کو بے پناہ وسائل سے نوازا ہے لیکن ان وسائل سے پوری طرح فائدہ نہیں اٹھایا گیا۔ پاکستان کی اس حالت کی ذمہ دار اشرافیہ ہے، جس نے قومی وسائل کی لوٹ مار سے ملک کو معاشی طور پر کمزور کیا۔ جاپان، جرمنی، ترکی اور چین کی مثالیں بھی ہمارے سامنے ہیں، جنہوں نے محنت کر کے تیز رفتاری سے ترقی کا سفر طے کیا۔ انہوں نے کہا کہ میں نہ امید نہیں ہوں ہماری قوم باصلاحیت ہے، اگر وہ کسی کام کے کرنے کا عزم کر لے تو کوئی پہاڑ اور سمندر راہ میں حائل نہیں ہوسکتا۔ انہوں نے کہاکہ پاکستان مسلم لیگ (ن) کی حکومت نے گزشتہ ساڑھے 4سالوں میں پاکستان کی ترقی و خوشحالی کے لئے انتھک محنت کی ہے۔ محمدنوازشریف کی قیادت میں توانائی بحران کے خاتمے کے لئے اٹھائے گئے اقدامات بار آور ثابت ہوئے ہیں۔ کوئلے، گیس، سولر، ہائیڈل اور دیگر ذرائع سے توانائی کے بڑے منصوبے مکمل کئے گئے ہیں جن سے ہزاروں میگاواٹ بجلی سسٹم میں آئی ہے۔ انفراسٹرکچر، ٹرانسپورٹ، تعلیم، صحت اور دیگر شعبوں کی ترقی کے لئے بھی انقلابی نوعیت کے اقدامات کئے گئے ہیں۔ انہوں نے کہا کہ ماضی میں کوئی ایسا میگا پراجیکٹ نہیں جو مقررہ مدت میں کرپشن سے پاک مکمل کیا گیا ہو، ہم نے ملک میں کرپشن فری کلچر کو فروغ دیا ہے اور توانائی سمیت ترقیاتی منصوبے، اعلیٰ معیار، شفافیت کے ساتھ ریکارڈ مدت میں مکمل کئے گئے ہیں۔ انہوں نے کہاکہ نوجوان ہمارا قیمتی سرمایہ او رپاکستان کے روشن مستقبل کی ضمانت ہےں۔ پاکستان کی تیزرفتار ترقی کے لئے انہیں ترقی کا انجن بنانا ہوگا۔ نوجوانوں کو سائنس و ٹیکنالوجی سے آراستہ کر کے ملک و قوم کی تقدیر بدلی جا سکتی ہے ۔ہم نے نوجوانوں کو بااختیار بنانے کے لئے بے مثال پروگرام شروع کر رکھے ہیں۔ دریں اثناءوزیراعلیٰ پنجاب کی زیر صدارت اجلاس ہوا جس میں صوبے میں امن و امان کی مجموعی صورتحال، یوم قائد اور کرسمس کی تقریبات کے سکیورٹی انتظامات کا جائزہ لیا گیا۔ وزیراعلیٰ محمد شہباز شریف نے یوم قائد اور کرسمس کی تقریبات کیلئے فول پروف سکیورٹی یقینی بنانے کی ہدایت کرتے ہوئے کہا کہ صوبہ بھر میں عوام کے جان ومال کے تحفظ کیلئے فول پروف سکیورٹی انتظامات کئے جائیں۔ یوم قائد اور کرسمس کی تقریبات کے حوالے سے وضع کردہ سکیورٹی پلان پر من و عن عملدرآمد یقینی بنایا جائے۔ انہوںنے کہا کہ عوام کے جان و مال کے تحفظ سے بڑھ کر کوئی اور ترجیح نہیں ہو سکتی۔ چرچوں ، مارکیٹوں ، بازاروں اور پارکوں کی سکیورٹی پر خصوصی توجہ دی جائے اورضرورت کے مطابق اضافی نفری بھی تعینات کی جائے۔ انہوں نے کہا کہ دشمن پاکستان کو عدم استحکام سے دوچار کرنے کے درپے ہے۔ وزیراعلیٰ پنجاب نے مہمند ایجنسی میں افغانستان سے دہشت گردوں کے حملے کی شدید مذمت کی ہے۔ وزیراعلیٰ نے حملے میں 3 سکیورٹی اہلکاروں کی شہادت پر دکھ اور افسوس کا اظہار کیا ہے۔ وزیراعلیٰ محمد شہبازشریف نے شہید اہلکاروں کے لواحقین سے دلی ہمدردی اور تعزیت کا اظہار کرتے ہوئے کہا ہے کہ شہید اہلکاروں نے وطن پر اپنی قیمتی جانیں نچھاور کی ہیں۔