ملک بھر میں موبائل فون سروس عارضی طور پر معطل کرنے کا فیصلہ کیا گیا ہے۔
ترجمان وزارت داخلہ کا کہنا ہے کہ ملک میں دہشت گردی کے حالیہ واقعات میں قیمتی جانوں کا ضیاع ہوا ہے، امن و امان قائم رکھنے اور ممکنہ خطرات سے نمٹنے کے لیے حفاظتی اقدامات ضروری ہیں، اس لیے ملک بھر میں موبائل سروس کو عارضی طور پر معطل کرنے کا فیصلہ کیا گیا ہے۔
کراچی، لاہور ، اور کوئٹہ کے مختلف علاقوں میں موبائل سروس متاثر ہونا شروع ہو گئی ہے، پشاور میں بھی پولنگ شروع ہونے سے پہلے موبائل سروس متاثر ہونا شروع ہو گئی ہے، پشاور کے علاقے صدر، نوتھیہ اور گلبرگ سمیت مختلف علاقوں میں موبائل فون سروس متاثر ہو رہی ہے۔
اس کے علاوہ جبکہ ملک کے مختلف شہروں میں انٹرنیٹ سروس بھی متاثر ہوئی ہے، سکھر کے مختلف علاقوں میں موبائل فون سروس معطل ہو گئی ہے۔
انٹرنیٹ سروس سے متعلق نگراں وفاقی وزیر اطلاعات مرتضیٰ سولنگی نے گزشتہ روز وی نیوز کو بتایا تھا کہ الیکشن کے دن پولنگ اور دیگر عوامل کے دوران انٹرنیٹ کی بندش سے متعلق کوئی بھی فیصلہ نہیں کیا گیا ہے، سیکیورٹی صورت حال قابو میں ہے اور کسی بھی قسم کی ہنگامی صورت حال سے نمٹنے کے لیے تیار ہیں۔
لائیو نیٹ ورک کے اعداد و شمار سے پتہ چلتا ہے کہ پاکستان میں موبائل انٹرنیٹ میں خلل پڑا ہے جس کا دوسرے سب سے بڑا آپریٹر زونگ پر بہت زیادہ اثر پڑا ہے۔
س سے صارفین کی جانب سےبڑے پیمانے پرموبائل سروس بندش کی رپورٹس کی تصدیق ہوتی ہے۔
ملک بھر میں الیکشن کمیشن کی 8300 ایس ایم ایس سروس بھی متاثر
دوسری جانب ملک کے مختلف شہروں میں موبائل فون سروس متاثر ہیں اور سگنلزغائب ہیں، جس کے باعث ملک بھر میں الیکشن کمیشن کی 8300 ایس ایم ایس سروس بھی متاثر ہیں۔
ذرائع کے مطابق ووٹ سے متعلق تمام معلومات فراہم کرنے والے 8300 ایس ایم ایس سروس بھی متاثر ہونے سے ملک بھر میں کروڑوں ووٹرز اپنے ووٹ کی معلومات حاصل کرنے سے محروم ہوگئے۔
ذرائع کے مطابق الیکشن کمیشن حکام کا کہنا ہے کہ 8300 سروس کی معطلی تشویش ناک ہے۔
ادھر چیف الیکشن کمشنر کا کہنا ہے کہ گزشتہ روز بلوچستان میں دہشت گردی کے واقعات ہوئے، امید ہے انتخابات کا عمل بخیریت مکمل ہوگا، الیکشن کمیشن وزارت داخلہ کو انٹرنیٹ سروسز کے حوالے سے کوئی ہدایات نہیں دے گا، ہم کہیں موبائل سروس کھول دیں اور دہشتگرد کا کوئی واقعہ ہوجائے تو کون ذمہ دار ہوگا۔ ہے۔
