گورنر پنجاب چوہدری محمد سرور کا کہنا ہے کہ کوئی شک نہیں اسلاموفوبیا، دہشت گردی اور انتہا پسندی میں صرف نام کا ہی فرق ہے۔
سماجی رابطے کی ویب سائٹ ٹویٹر پر اپنی ٹویٹ میں چوہدری محمد سرور کا کہنا تھا کہ اسلامو فوبیا کے خلاف وزیر اعظم عمران خان کی آواز پوری دنیا میں پہنچ رہی ہے اور دنیا ان کی ہم آواز بن رہی ہے، دنیا کو سمجھ لینا چاہیے امن کاراستہ بھی اسلاموفوبیا کے خاتمے سے ہی نکلتا ہے۔
چوہدری محمد سرور کا کہنا ہے کہ جیسے دنیا دہشت گردی کے خلاف متحد ہے ایسے اسلامو فوبیا کیخلاف بھی ایک ہونا ہوگا، کوئی شک نہیں کہ اسلاموفوبیا، دہشت گردی اور انتہا پسندی میں صرف نام کا ہی فرق ہے، مغربی دنیا میں اسلام کے خلاف نفرت پھیلانے والے بھی انتہا پسند ہی ہیں، دنیا میں پائیدار امن کے لیے مختلف مذاہب کو ایک دوسرے کے مذہبی جذبات کا احترام کرنا ہوگا۔
گورنر پنجاب نے کہا کہ روسی صدر ولادی میر پیوٹن کے بعد جسٹن ٹروڈو کے اسلامو فوبیا کے خلاف عملی اقدام خوش آئند ہے، کینیڈا کے وزیراعظم کی اسلامو فوبیا کی مذمت عمران خان کے مؤقف کی جیت ہے
