لاہور میں بارش، سموگ کا زور ٹوٹنے لگا، ائیر کوالٹی انڈیکس 225 ریکارڈ

لاہور (صباح نیوز) وقفے وقفے سے ہونے والی رم جھم سے فضائی آلودگی کی شدت میں وقتی کمی ہوئی تاہم افق پر اب بھی سموگ چھائی ہے، لاہور کا اوسطا ائیر کوالٹی نڈیکس 225 ریکارڈ کیا گیا۔واہگہ کے سرحدی علاقے 334 اے کیو آئی کے ساتھ فضائی آلودگی میں سرفہرست رہا ، سندر انڈسٹریل اسٹیٹ کا اے کیو آئی 262، پنجاب اسمبلی اور چیئرنگ کراس 253، شملہ پہاڑی اور گردونواح کا ائیر کوالٹی انڈیکس 234 ریکارڈ کیا گیا۔ڈی ایچ اے کا اے کیو آئی 206، اقبال ٹاﺅن 201، کینال روڈ 200، ائیرپورٹ سے ملحقہ علاقوں کا 196، اپر مال 184 اور گلبرگ میں 179 ریکارڈ کیا گیا۔ لاہور میں وقفے وقفے سے ہونے والی بوندا باندی سے سرد موسم نے بھی اپنا رنگ جمانا شروع کر دیا، باغوں کا شہر خنک ہواﺅں کی لپیٹ میں رہا ، بادل برسنے سے ٹھنڈ میں اضافہ ہو گیا۔دوسری جانب سموگ سے بچاﺅ کے لیے شہر کے تمام سرکاری اور پرائیویٹ سکول بھی بند رہے، سکولز مالکان نے حکومت سے سموگ کے خاتمے کیلئے مستقل حل ڈھونڈنے کا مطالبہ کیا ہے۔ محکمہ موسمیات نے آئندہ چوبیس گھنٹوں کے دوران مزید بارش کی نوید سنا دی ۔