لاہور (ویب ڈیسک)پاکستان کرکٹ ٹیم کے اوپنر فخرزمان گھٹنے کی انجری کے باعث پری سیزن کیمپ سے باہر ہوگئے۔پاکستان کرکٹ بورڈ (پی سی بی) کی جانب سے جاری بیان کے مطابق ‘فخرزمان کو دائیں گھٹنے کی انجری سے صحت یابی کے لیے ایک ہفتے کا آرام کرنے کی تجویز دی گئی ہے جس کے باعث وہ پری سیزن کیمپ سے باہر ہوگئے ہیں’۔بیان کے مطابق ‘پی سی بی کی میڈیکل ایڈوائزری کمیٹی نے فخر زمان کے ایم آر آئی کا جائزہ لینے کے بعد ان کی بحالی کا پروگرام جاری کردیا ہے’۔پی سی بی کی میڈیکل ایڈوائزری کمیٹی 10 روز بعد ایک مرتبہ پھر فخرزمان کی انجری کا جائزہ لے گی۔خیال رہے کہ پی سی بی نے 29 اگست کو اپنے بیان میں کہا تھا کہ قومی ٹیم کے فاسٹ باﺅلر شاہین شاہین شاہ آفریدی ڈینگی کا شکار ہوکر سیزن کیمپ سے باہر ہوگئے ہیں جس کے بعد قومی ٹیم کا دوسرا اہم کھلاڑی انجری کے باعث کیمپ سے باہر ہوگیا ہے۔پی سی بی نے اپنے بیان میں کہا تھا کہ فخرزمان کے دائیں گھٹنے کا ایم آر آئی اسکین کروایا گیا ہے جس کی رپورٹ آنے کے بعد میڈیکل ایڈوائزری پینل انجری کی نوعیت کا جائزہ لے گا۔واضح رہے کہ قومی کرکٹ ٹیم کا پری سیزن کیمپ لاہور کے قذافی اسٹیڈیم میں جاری ہے جبکہ قومی ٹیم کے ہیڈ کوچ کے انتخاب کے لیے امیدواروں کے انٹرویوز بھی جاری ہیں جو ستمبر کے اوائل میں ہی کسی نام کو حتمی شکل دے دی گی۔قومی کرکٹ ٹیم ستمبر کے اواخر میں سری لنکا کے خلاف 3 ون ڈے اور 3 ٹی ٹوئنٹی میچز کھیلے گی جس کے لیے سری لنکن ٹیم پاکستان کا دورہ کرے گی۔سری لنکا کی ٹیم تینوں ون ڈے کراچی جبکہ تینوں ٹی ٹوئنٹی لاہور کے قذافی اسٹیڈیم میں کھیلے جائیں گے۔
