ملتان (خبرنگار) ”خبریں“ میڈیا گروپ کے کسان میلے کا افتتاح گورنر پنجاب چودھری سرور 26اپریل کو کریں گے جبکہ کسان میلے کی اختتامی تقریب کے مہمان خصوصی وزیراعلیٰ پنجاب سردار عثمان بزدار ہونگے۔ دونوں معزز مہمانان گرامی نے اپنی شرکت کی یقین دہانی کرادی ہے۔ پاکستان میں سب سے بڑا کسان میلہ 26 تا 28 اپریل قلعہ کہنہ قاسم باغ میں منعقد ہوگا جس میں پاکستان بھر سے زراعت کے تمام شعبوں سے وابستہ کمپنیاں بھرپور شرکت کریں گی۔ ان کے علاوہ تین دن زراعت کے مختلف موضوعات پر کانفرنسیں بھی ہونگی۔ زرعی ماہرین، معاشی ماہرین، سیاسی و سماجی رہنماﺅں کے علاوہ زرعی یونیورسٹی کے طلباءوطالبات، اساتذہ، سنٹرل کاٹن ریسرچ انسٹی ٹیوٹ کے زرعی ماہرین، محکمہ زراعت، کاٹن، مینگوریسرچ کے علاوہ کسان، مزدور اور کسانوں کی مختلف تنظیموں کے نمائندے و عہدیدار بھرپور شرکت کریں گے۔ کسان میلے کے اوقات صبح 10 بجے سے شام 6 بجے تک ہونگے۔ اس کے بعد رنگا رنگ ثقافتی پروگرام رات 12 بجے تک جاری رہیں گے۔ جس میں دنگل، وگتی، موسیقی اور آتش بازی کے خوبصورت مظاہرے بھی ہونگے۔ تین دن تک کسان میلہ عوام کو بھرپور علم اور تفریح مہیا کرے گا۔ ”خبریں“ میڈیا گروپ کے کسان میلہ کی معاون کمپنیوں اور گروپوں میں تارا گروپ، پیپسی کولا شمیم اینڈ کمپنی، علی اکبر گروپ، پیٹرون گروپ، سن کراپ گروپ، بائیوو ٹریک، وِز واش، سولیکس کیمیکلز، ای دی آل گروپ، اپنا بینک، چوہان ڈویلپرز، شمع بناسپتی، کو اور سنٹرل، جالندھر سیڈز شامل ہیں۔
کسان میلہ
