راولپنڈی (مانیٹرنگ ڈیسک) ڈی جی آئی ایس پی آر میجر جنرل آصف عفور نے کہا ہے کہ پاک فوج کنٹرول لائن پر بھارت کے کسی بھی مس ایڈونچر کا بھر پور جواب دینے کے لئے تیار ہے، پاکستانی افواج کے ہمہ وقت تیار رہنے کی وجہ کوئی جھوٹا بھارتی دعویٰ یا بیان بازی نہیں۔ میڈیا رپورٹس کے مطابق انہوں نے کہا کہ بھارت سے خطرہ مستقل ہے، پیشہ وارانہ فوج کی حیثیت سے ان کے لئے ہمیشہ تیار رہتے ہیں۔ میجر جنرل آصف عفور نے کہا کہ بھارت پر نظر آنے والے جنگی جنون کا سبب اندرونی سیاسی صورتحال ہے۔ ان کا کہنا تھا کہ دونوں ملکوں کے ڈی جی ایم اوز کا ہفتہ وار ہاٹ لائن رابطہ اور فلیگ میٹنگز معمول کے مطابق ہو رہی ہیں۔ گزشتہ دنوں بھارت کے 2 جاسوس ڈرون لائن آف کنٹرول پر پاک فوج نے مار گرائے تھے۔
