واشنگٹن: امریکا کے ارکان پارلیمنٹ نے پاکستان میں ہونے والے عام انتخابات کے لیے نیک تمناؤں کا اظہار کرتے ہوئے کہا ہے کہ ملک میں جمہوری عمل جاری رہنا چاہیے اور عوام کو اپنی پسندیدہ قیادت کو لانے کا پورا حق ہونا چاہیے۔
امریکی خبر رساں ادارے کے مطابق میڈیا سے گفتگو میں کانگریس کے رکن بریڈ شرمین نے کہا کہ الیکشن کے نتیجے میں کون اقتدار میں آتا ہے، یہ اتنا اہم نہیں بلکہ زیادہ اہم یہ ہے کہ اقتدار میں کیسے آئے۔
بریڈ شرمین نے کہا کہ امریکا دنیا بھر کے دیگر ممالک کی طرح پاکستان میں بھی آزادانہ، منصفانہ اور شفاف انتخابات کی حمایت کرتا ہے چاہے اس کے نتیجے میں کوئی بھی منتخب ہوکر اپنی حکومت بنائے۔
اسی طرح کانگریس کی رکن شیلا جیکسن نے کہا کہ پاکستان میں ہونے والے انتخابات وہاں کے عوام کے لیے ایک اہم سنگ میل کی حیثیت رکھتے ہیں۔ آزادانہ اور منصفانہ انتخابات کسی بھی ملک کے استحکام کے لیے نہایت ضروری ہوتے ہیں۔
امریکی وزارت خارجہ کے ترجمان ویدانت پٹیل نے بھی پاکستان میں عام انتخابات اور جمہوری عمل کے جاری رہنے کو خوش آئند قرار دیا تاہم انھوں نے موبائل فون اور انٹرنیٹ کی بندش پر تشویش کا اظہار بھی کیا۔
