اسلام آباد:(ویب ڈیسک) وزیر خزانہ اسحاق ڈار نے کہا کہ آئی ایم ایف کی تمام پیشگی شرائط پوری کرچکے ہیں، پاکستان نے ڈیفالٹ کیا اور نہ ہی کرے گا۔
اسلام آباد میں بزنس کمیونٹی کی تقریب سے خطاب کرتے ہوئے وزیر خزانہ اسحاق ڈار کا کہنا تھا کہ پاکستان ڈیفالٹ کرنے کے لیے نہیں بنا ہے، ہمیں آئی ایم ایف کے بغیر رہنا سیکھنا ہوگا۔
وزیر خزانہ نے تاجر برادری سے بجٹ تجاویز مانگتے ہوئے کہا کہ بزنس کمیونٹی کے مسائل سے متعلق شکایات حل کی جائیں گی کیونکہ تاجر برادری اکانومی کی بیک بون ہے ، حکومت کوئی بھی ہو تنہا کچھ بھی نہیں کرسکتی، اب تک جوکچھ بھی ہوا اب ہمیں آگے بڑھنا ہوگا، ملک کی تیزترترقی کےلیےصنعتی شعبے کا فروغ ناگزیر ہے۔
اسحاق ڈار نے کہا کہ گزشتہ چند ماہ قبل پاکستان ڈیفالٹ کے خطرہ والی لسٹ میں تھا، بزنس کمیونٹی انڈسٹری اور دیگر کی کاوشوں سے بہت بہتری آچکی، 2017 میں پاکستان کس سٹیج پر تھا 2022 میں ہم کہاں تھے، مسلم لیگ (ن) کےسابقہ دورمیں ملک تیزی سےترقی کررہا تھا۔
انہوں نے کہا کہ ہماری بدقسمتی ہے کہ پاکستان میں 2.4 مہنگائی کی شرح تھی آج ہم کہاں کھڑے ہیں، اللہ کے فضل و کرم سے پاکستان کو آگے لے کر جائیں گے، پاکستان کا بیرونی قرضہ 4 ارب ڈالر کم ہوا ہے، بہت جلد آئی ایم ایف پروگرام بھی سائن ہو جائے گا اور بورڈ میٹنگ بھی ہو جائے گی۔
