دمشق: (ویب ڈیسک) شام میں پاکستانی سفارت خانے نے دمشق کے پاکستان انٹرنیشنل سکول کے تعاون سے شام کے زلزلہ متاثرین کے لئے امدادی سامان کا ٹرک عطیہ کیا ہے۔
امدادی سامان کے ساتھ 20 ملین شامی پاؤنڈز کا چیک بھی صوبہ حما کے گورنر کو پیش کیا گیا، طلبہ نے پاکستانی سفیر کے ہمراہ زلزلہ متاثرین کے کیمپوں کا دورہ کیا اور متاثرین میں سامان تقسیم کیا۔
طلبہ نے تمام سامان ٹرک پر خود لوڈ کیا اور اتارا،حما کی انتظامیہ نے اس اقدام کو بے حد سراہا اور اپنے شامی بھائیوں کے ساتھ کھڑے ہونے پر پاکستانی عوام کا شکریہ ادا کیا۔
میڈیا کی ایک بڑی تعداد نے اپنی نوعیت کی اس منفرد تقریب کی کوریج کی۔
