شاہد آفریدی سیلاب متاثرین کو میچ فیس عطیہ کرنے پر بین اسٹوکس کے معترف

کراچی: (ویب ڈیسک) گزشتہ دنوں انگلینڈ کی ٹیسٹ ٹیم کے کپتان بین اسٹوکس نے پاکستان میں سیلاب متاثرین کی مدد کیلئے بڑا اعلان کیا۔
انگلش کپتان بین اسٹوکس نے سیلاب متاثرین کی مدد کیلئے پاکستان کیخلاف ٹیسٹ سیریز کی اپنی مکمل میچ فیس کی رقم عطیہ کرنے کا اعلان کیا۔
بین اسٹوکس نے کہا کہ اس سال کے شروع میں پاکستان میں تباہ کن سیلاب کو دیکھ کر بہت دکھ ہوا۔
پاکستان کرکٹ ٹیم کے سابق کپتان شاہد آفریدی انگلش کرکٹر کے اس اقدام پر ان کی تعریف کیے بغیر نہ رہ سکے۔
سوشل میڈیا پر بیان جاری کرتے ہوئے شاہد آفریدی نے پہلے انگلش ٹیم کو 17 سال بعد پاکستان میں ٹیسٹ میچ کھیلنے پر خوش آمدید کہ اور پھر بین اسٹوکس کی تعریف کی۔
انہوں نے لکھا کہ’ سیلاب متاثرین کے لیے بین اسٹوکس کا اقدام قابل احترام ہے،بین آپ ہمارے کھیل کے سچے سفیر ہیں۔امید ہے آپ کے اس عمل سے دوسرے بھی متاثر ہوں گے ‘۔
خیال رہے کہ انگلش کرکٹ ٹیم پاکستانی سرزمین پر 17 سال بعد ٹیسٹ سیریز کھیلنے کیلئے اسلام آباد پہنچی ہے۔
انگلینڈ اور پاکستان کے درمیان تین میچز کی سیریز یکم دسمبر سے شروع ہوگی۔