ٹوکیو: (ویب ڈیسک) جاپان وہ انوکھی سرزمین ہے جہاں بلیوں، سانپوں اور مچلھیوں کے لیے ریستوران اور کیفے موجود ہیں۔ اسی تناظر میں اب ایسے مصنفین کے لیے ایک کیفے بنایا گیا ہے جن پر کم وقت میں اپنا کام مکمل کرنے کا دباؤ ہوتا ہے۔ یہاں ان کی حوصلہ افزائی سمیت ہرممکن مدد کی جاتی ہے۔
ٹوکیو کے نواحی علاقے کوئنجی میں واقع اس ریستوران کا نام ’مسودہ لکھنے والا کیفے‘ رکھا گیا ہے۔ یہاں صرف ایسے لوگوںکو آنے کی اجازت ہے جو کسی اہم تحریر پر کام کررہے ہوں اور کم وقت میں انہیں زیادہ کام کرنا ہو۔ یہ کیفے انہیں مقررہ وقت میں تحریر مکمل کرنے کی حوصلہ افزائی (موٹی ویشن) فراہم کرتا ہے اور انہیں ہرطرح کا آرام بھی فراہم کرتا ہے۔
کیفے کے مالک ٹاکویا کوائی کہتے ہیں کہ ’ یہاں صرف ایسے لکھاریوں کو مدعو کیا جاتا ہے جن کے پاس وقت کم ہوتا ہے اور اسی مدت میں کام ختم کرنا ہوتا ہے۔ یہی وجہ ہے کہ کیفے کے اندر کا ماحول بہت سنجیدہ ہوتا ہےجہاں مصنف انتہائی توجہ سے اپنی ڈیڈلائن پر کام ختم کرنے کےلیے آتے ہیں۔‘
کیفے کو چند روز قبل ہی کھولا گیا ہے جہاں نصف گھںٹے کا کرایہ ایک ڈالر 32 سینٹ لیا جاتا ہے۔ یہاں وائی وائی مفت ہے، کمپیوٹر کےلیے میز رکھی ہیں اور مصنف اپنا کھانا اور مشروبات ساتھ لاسکتے ہیں۔ تاہم چائے، کافی اور پانی مفت میں دستیاب ہے۔
یہی وجہ ہے کہ مترجمین، پروف خواں، ناول نگار اور شاعروں کی بڑی تعداد یہاں آتی ہے اور سب کے لیے یکساں معیارات ہیں۔ ہر لکھاری کو اندر داخل ہوکر بتانا پڑتا ہے کہ وہ آج کتنے الفاظ لکھے گا اور کتنے وقت میں کام مکمل کرے گا۔ اس کے بعد عملے کے افراد درمیان میں کارکردگی معلوم کرتے رہتے ہیں اور ہر گھنٹے بعد کام کی صورتحال کا پوچھتے ہیں اور حوصلہ افزائی بھی کرتے رہتے ہیں۔
لیکن اگر آپ نے کیفے میں ’ایس‘ کورس منتخب کیا ہے تو عملہ بہت سختی سے آپ سے کام کروائے گا جبکہ ’ایم‘ کورس والے قدرے نرمی سے پیش آتے ہیں۔
لیکن یہ واضح نہیں ہوسکا کہ کام ختم ہونے کے لیے کونسے حربے آزمائے جاتےہیں یعنی کام کے اختتام کو کیسے دیکھا جاتا ہے اور ڈیڈلائن کا تعین کیوں اور کیسے کیا جاتا ہے کیونکہ کیفے کو رات کو بند کرنا ضروری ہوتا ہے۔
ایک اور مسئلہ یہ ہے کہ کیفے درحقیقت ایک نشریاتی اسٹوڈیو میں بنایا گیا ہے اور جب جب وہاں کام نہیں ہوتا اسی وقت لکھاریوں کو مدعو کیا جاتا ہے۔ اس طرح مہینے میں چند روز ہی مصنفین یہاں آسکتے ہیں۔
