وارسا: (ویب ڈیسک) پولینڈ نے روس کے لیے جاسوسی کرنے کے الزام میں 45 سفارت کاروں کو ملک برد کردیا۔
عالمی خبر رساں ادارے کے مطابق پولینڈ کے وزیر داخلہ مارئیس کامنسک نے میڈیا کو بتایا کہ سفارت کاروں کے بھیس میں 45 روسی جاسوسوں کو ملک بدر کردیا اور اپنے ملک میں روس کے اسپیشل سروسز نیٹ ورک کو ختم کر رہے ہیں۔
قبل ازیں پولینڈ کے انٹیلی جنس ادارے کے ترجمان نے میڈیا کو بتایا تھا کہ روس کے 45 سفارت کاروں نے سفارتی سرگرمیوں کی آڑ میں پولینڈ کی جاسوسی کی جس کے مکمل شواہد موجود ہیں۔ وزارت خارجہ کو آگاہ کردیا گیا ہے۔
ترجمان کا مزید کہنا تھا کہ روسی سیکرٹ سروس کے لیے جاسوسی کرنے کے شبے میں ایک پولش شہری کو بھی حراست میں لیا گیا ہے جو وارسا رجسٹری آفس کے آرکائیوز میں کام کرتا تھا۔
پولینڈ یورپی یونین کا رکن ملک ہے جس کی سرحد یوکرین سے ملتی ہے۔ روس نے خدشہ ظاہر کیا ہے کہ پولینڈ، یوکرین کو جنگی ساز و سامان مہیا کرسکتا ہے۔
