وزیر اعظم عمران خان نے کہا ہے کہ بیرونِ ملک مقیم پاکستانی ہمارا قیمتی اثاثہ ہیں۔
وزیراعظم عمران خان کی زیر صدارت اعلیٰ سطح کا اجلاس ہوا جس میں وزیر اعظم عمران خان کا کہنا تھا کہ حکومت ترسیلاتِ زر بھیجنے والے بیرونِ ملک مقیم پاکستانیوں کو مزید سہولیات دینے کیلئے پُر عزم ہے۔
وزارتِ خزانہ اور سٹیٹ بنک مل کر ترسیلاتِ زر بھیجنے والے بیرونِ ملک مقیم پاکستانیوں کیلئے ایک جامع پیکیج تیار کر رہے ہیں۔
وزیر اعظم عمران خان کا کہنا تھا کہ ترسیلاتِ زر کے بڑھتے ہوئے اعشاریے انکے حکومت کی پالیسیوں پر اعتماد کو ظاہر کرتے ہیں۔
وزیر اعظم نے اجلاس کی صدارت کرتے ہوئے کہا کہ بھیجی گئی رقوم کے تناسب سے مالی مراعات و انعامات شامل ہیں ، بینیفشری اکاؤنٹ کھولنے اور رقوم کی فوری منتقلی بھی یقینی بنائی جا رہی ہے۔
وفاقی وزراء نے وزیر اعظم کو بریفنگ دیتے ہوئے کہا کہ مراعات کی فراہمی کیلئے 9 بڑے قومی اداروں کے ساتھ مل کر کام کیا جا رہا ہے۔ سفری سہولیات سے لے کر شناختی دستاویزات کی تیاری، اشیاءِ ضروریہ کی خریداری، ٹیکس کی ادائیگی، انشورنس اور بچوں کے تعلیمی اخراجات میں رعایت و مراعات فراہم کریں گے۔
وفاقی وزراء کا کہنا تھا کہ آئندہ ماہ کے شروع تک کام مکمل کر کے پروگرام کا باقاعدہ اجراء کر دیا جائے گا، مذکورہ نظام کیلئے ایک ڈیجیٹل ایپلیکیشن بھی تیاری کے مراحل میں ہے۔
وزیراعظم عمران خان نے ہدایت کرتے ہوئے کہا کہ ان اقدامات سے متعلق وضع کردہ معینہ مدت میں کام کی تکمیل کو یقینی بنایا جائے،منصوبے کی کڑی نگرانی کیلئے لائحہ عمل بنا کر شکایات کے ازالے کیلئے پورٹل بھی منصوبے کا حصہ بنایا جائے۔
اجلاس میں وزیرِ خزانہ شوکت فیاض ترین، معاونِ خصوصی ڈاکٹر شہباز گِل، گورنر سٹیٹ بنک رضا باقر ، چیئرمین نادرا محمد طارق ملک اور متعلقہ اعلیٰ افسران نے بھی شرکت کی۔
