مقبوضہ کشمیر میں شکریہ پاکستان، شکریہ عمران خان کے پوسٹر لگ گئے۔
کشمیر میڈیا سروس کے مطابق یومِ یکجہتی کشمیر کے موقع پر مقبوضہ کشمیر کے کئی علاقوں میں وزیرِاعظم پاکستان عمران خان کی تصویر والے پوسٹرز آویزاں کر دیئے گئے ہیں۔
ذرائع کے مطابق یہ پوسٹرز سری نگر اور دیگر علاقوں میں آویزاں کیے گئے ہیں، پوسٹرز میں پاکستانی عوام اور وزیرِ اعظم عمران خان سے اظہارِ تشکر کیا گیا ہے۔
ان پوسٹرز میں کشمیر کا مسئلہ عالمی سطح پر اجاگر کرنے کیلئے شکریہ پاکستان، شکریہ عمران خان کے پیغامات درج ہیں۔
کشمیر میڈیا سروس کے مطابق مقبوضہ کشمیر کے گلی کوچوں میں یہ پوسٹرز جموں و کشمیر لبریشن الائنس کی جانب سے لگائے گئے ہیں۔
واضح رہےکہ پاکستان سمیت دنیا کے مختلف حصوں میں آج یوم یکجہتی کشمیر منایا جارہا ہے جس کا مقصد کشمیری عوام کے ساتھ اقوام متحدہ کی قراردادوں کے تحت ان کے حق خودارادیت کے حصول کی جدوجہد کی حمایت کا اظہار کرنا ہے۔
ملک بھر میں صبح دس بجے ایک منٹ کی خاموشی اختیار کی گئی جبکہ اسلام آباد، مظفر آباد، گلگت اور چاروں صوبائی دارالحکومتوں میں یکجہتی واکس کا بھی اہتمام کیا جارہا ہے۔
