حکومت اور تحریک لبیک پاکستان کے درمیان ہونے والے مذاکرات کامیاب ہوگئے ہیں۔
تفصیلات کے مطابق حکومت اور تحریک لبیک کے درمیان ہونے والے مذاکرات کامیاب ہوگئے جس کے بعد اسلام آباد اور راولپنڈی میں موبائل سروس بحال کر دی گئی۔
حکومت کی جانب وفاقی وزیر مذہبی امور نورالحق قادری اور وزیر داخلہ نے مظاہرین سے مذاکرات کئے۔
ترجمان وزارت مذہبی امور کے مطابق حکومت کی طرف سے ان مذاکرات میں وزیر داخلہ بریگیڈیئر سید اعجاز شاہ، وزیراعظم کے مشیر برائے داخلہ شہزاد اکبر، کمشنر اسلام آباد عامر احمد علی اور سیکریٹری داخلہ بھی مذاکراتی ٹیم میں شامل تھے۔
ترجمان وزارت مذہبی امور نے کہا کہ وفاقی حکومت نے پوری صورتحال کو انتہائی تدبر اور ذمہ داری سے ہینڈل کیا، تحریک لبیک احتجاج ختم ہونے کا امکان ہے۔
ترجمان وزارت مذہبی امور نے مزید کہا کہ کل پورا دن اور پوری رات پوری حکومتی مشینری نے مظاہرین اور شہریوں کی جان و مال کی حفاظت کیلئے تمام تر اقدامات کیے جبکہ آج بھی معاملات کو مذاکرات کے ذریعے حل کرنے پر زور دیا گیا۔
یاد رہے اس سے قبل وزیراعظم عمران خان نے فیض آباد میں جاری مذہبی جماعت کے دھرنے کا نوٹس لیتے ہوئے وزیر مذہبی امور نورالحق قادری کوفوری طلب کیا تھا۔
ذرائع کے مطابق وزیراعظم عمران خان نے پیر نور الحق کو فیض دھرنا والوں سے مذاکرات کی ہدایت دی تھی۔
واضح رہے کہ یہ دھرنا پاکستان کے دارالحکومت اسلام آباد اور اس کے جڑواں شہر راولپنڈی کے سنگم پر واقعے فیض آباد چوک پر جاری ہے۔
