خارقمر میں پاک فوج پر حملہ، لیفٹیننٹ کرنل، میجر اور دو اہلکار شہید

کوئٹہ(ویب ڈیسک) شمالی وزیر ستان کے علاقے خارقمر میں بارودی سرنگ کے دھماکے میں لیفٹیننٹ کرنل، میجر اور دو اہلکار شہید جب کہ 4 اہلکار زخمی ہوگئے۔آئی ایس پی آر کے مطابق شمالی وزیرستان کے علاقے خار قمر میں فورسز کو ایک بار پھر دہشت گردی کا سامنا ہے جہاں دہشت گردوں نے فوجی گاڑی کو سڑک پر نصب بارودی سرنگ سے نشانہ بنایا جس کے باعث پاک فوج کے تین افسر اور ایک جوان شہید جب کہ ،چار جوان زخمی ہوگئے ہیں۔آئی ایس پی آر کے مطابق شہداءمیں کریم آباد ہنزہ کے رہائشی لیفٹیننٹ کرنل راشد کریم بیگ، کراچی کے رہائشی میجر معیذ مقصود بیگ، لکی مروت سے تعلق رکھنے والے کیپٹن عارف اللہ اور چکوال سے تعلق رکھنے والے لانس حوالدار ظہیر شہید شامل ہیں۔پاک فوج کے شعبہ تعلقات عامہ نے مزید کہا کہ اسی علاقے سے چند دن قبل فورسز نے سرچ آپریشن کر کے چند سہولت کاروں کو پکڑا تھا اور پچھلے ایک ماہ میں فورسز کے 10 جوان شہید اور 35 زخمی ہو چکے ہیں۔