لاہور (مانیٹرنگ ڈیسک)چینل فائیو کے پروگرام ”نیوز ایٹ سیون“میں گفتگوکرتے ہوئے سابق وزیر خارجہ سردار آصف احمد علی نے کہا ہے کہ پاکستان کی معاشی حالت کے پیش نظر عوام کو دو سے ڈھائی سال کی تکلیف برداشت کرنی پڑے گی۔حکومت کی وسائل بڑھانے کے لیے ٹیکسیشن اور منی لانڈرنگ کے ذریعے پیسے اکٹھے کرنے کی پالیسی غلط ہے ، حکومتی ترجیحات میں پیداوار اور ترقی کو شامل کرنا ہوگا۔ منی لانڈرنگ کے خلاف اقدامات سے بزنس کمیونٹی کو دھچکا لگ رہا ہے وہ سرمایہ کاری نہیں کر ینگے۔حکومت کی ترجیحات ٹیکسٹائل ، انڈسٹرلائزیشن اور زراعت کو اپنے پاﺅں پر کھڑا کرنا ہے۔26ارب ڈالر خسارہ ہر حالت میں آئی ایم ایف کے پاس لیجائے گا۔ آئی ایم ایف کے پاس جانے سے پاکستان کی معاشی ساکھ بڑھے گی۔ مسلم لیگ ن کے رہنما سینیٹر جنرل (ر)عبدالقیوم نے پاکستان کی خارجہ پالیسی پر گفتگو کرتے ہوئے کہا کہ زلمے خلیل زاد افغان مذاکرات کی کامیابی کے مشن پر پاکستان کا دورہ کر رہے ہیں۔پاکستان سمیت تمام ممالک چاہتے ہیں کہ امن مذاکرات کامیاب ہوں۔ طالبان معصوم نہیں، انہیں سیز فائر نہیں ایکشن سے جیت ملی ، مطالبات کی منظوری تک طالبان دباﺅ ڈالے رکھیں گے۔ وزیراعظم کے اگلے دورہ چین میںسی پیک ، افغان امن عمل،پاک بھارت کشیدگی، ایف اے ٹی ایف اور مسعود اظہر کو دہشتگرد قرار دینے کا ایشوزیر بحث رہے گا۔ دوست ممالک کی عالم فورم پر پاکستان کی مدد کے تناظرمیں حکومت پر بھاری ذمہ داری عائد ہوتی ہے کہ کوئی بھی کالعدم تنظیم ایسا کام نہ کرے جسکا ملبہ پاکستان پر گرے۔ پلوامہ حملے کے بعد مذہبی تنظیموں کیخلاف کاوائی کا وقت نہیں تھا مگر حکومت نے کیا۔ ایسے میں دنیا کو بتانے کی ضرورت ہے کہ دنیا کے ہر ملک میں دہشتگرد طبقہ ہے۔ امریکا اور بھارت سمیت دنیا ایک ایجنڈے کے تحت ہٹ دھرمی پر ڈٹی ہے اور اپنے مفادات کی خاطر پاکستان کی سننے کو تیار نہیں۔ مودی خوددہشتگرد ہے، امریکا نے خود اس پر پابندی لگائی تھی۔بھارت میں ریاستی عناصر دہشتگرد ہیں۔نواز شریف نے کڑے وقت کا سامنا کیا ، انہیں انصاف ملنا چاہیے۔ احتساب کا رخ صرف اپوزیشن کی طرف ہے ، انتقامی سیاست کی بجائے سب کا احتساب ہونا چاہیے۔نواز شریف کی رہائی پر حکومتی حلقوں میں رونگٹے کھڑے ہوگئے ہیں۔ پیپلز پارٹی کے رہنما صفدر عباسی نے کہا کہ شہید ذوالفقار علی بھٹو کو سیاسی جدو جہد، نظریاتی و جمہوری نظام کے تعمیل پر خراج تحسین پیش کرتے ہیں۔ آج بھٹو کی پیپلز پارٹی کہیں نہیں ہے۔بھٹو نے پاکستان کے دو لخت ہونے کے بعد عوام کو یکجا کیا،انکے بعد بے نظیر نے مذاہمتی سیاست جاری رکھی۔بے نظیر چاروں صوبوں کی حقیقی زنجیر تھیں۔ سینئر رہنما و ماہر قانون شاہ خاور نے کہا کہ جعلی اکاﺅنٹس کیخلاف پہلا انٹیرم ریفرنس احتساب عدالت میں داخل ہوا ہے، اس نامکمل ریفرنس میں سپلیمنٹری ریفرنسز بھی آئیں گے اور ملزمان کی تعداد میں مزیداضافہ ہوگا۔ ملزمان کے خلاف تفتیش مکمل ہونے پر حتمی ریفرنس جاری کیا جائے گا۔ ریفرنس کی سماعت کے دوران جے آئی ٹی پرملزمان کے تحفظات کو بھی دیکھا جائے گا۔ ملزمان کے خلاف شہادتوں اور گواہان کے بیانات پر مشتمل مزید ریفرنسزپر نیب کو اختیار ہے کہ سپلیمنٹری یا حتمی ریفرنس جاری کرے۔
