فضل الرحمن حواس کھو چکے ہیں : فیاض الحسن چوہان کا انکشاف

لاہور (خبر نگار) وزیراطلاعات و ثقافت پنجاب فیاض الحسن چوہان نے کہا ہے کہ مولانا فضل الرحمان کا بس اور ان کی سیاسی بس ڈیزل سے چلتی تھی، آج کل ان کی سیاسی بس کا رنگ پسٹن اور انجن ناکارہ ہوچکاہے،ڈیزل تو الیکشن کے بعد ویسے ہی ان کی پہنچ سے باہر ہے۔ اس لیے ان کا بس اور ان کی سیاسی بس دونوں بے بس ہوچکے ہیں۔ ان خیالات کا اظہار وزیراطلاعات و ثقافت پنجاب فیاض الحسن چوہان نے مولانا فضل الرحمان کے بیان”میرا بس چلے تو ایک دن بھی اس حکومت کو چلنے نہ دوں“ کے ردعمل میں سماجی رابطے کی ویب سائٹ پر کیا۔ قبل ازیں اپنے ایک بیان میں صوبائی وزیر کا کہنا تھا کہ مولانا فضل الرحمان الیکشن میں ہارنے کے بعد سے اپنے حواس کھو چکے ہیں۔ وہ وقتاً فوقتاً پی ٹی آئی کی حکومت کے خلاف ہرزہ سرائی میں مشغول رہتے ہیں۔ ان کا اپنا یہ حال ہے کہ 73 کے آئین کی آڑ لے کر 74 قسم کی کرپشن اور 75 قسم کی اقربا پروری کرتے ہیں۔ اصول کے بجائے وصول کی سیاست پر یقین رکھتے ہیں۔ مولانا جیسا ہر کرپٹ سیاستدان اپنے اپنے طور سے کرپشن، لوٹ مار، منی لانڈرنگ اور قومی خزانے کے استحصال میں ملوث ہوتا ہے لیکن جب قانون کا شکنجہ ان کے گرد تنگ ہونے لگتا ہے تو یہ اس قسم کے بیانات داغ دیتے ہیں۔ مگر یہ چاہے جو مرضی کر لیں لٹیروں کو احتساب کا سامنا کرنا پڑے گا۔ بدمعاشیہ کی چیخیں اور مخالفین کی کھوکھلی تنقید کرپشن کے خلاف حکومتی عزم کو کمزور نہیں کر سکتا۔ اس قسم کے سیاسی گماشتے عوام کو تحریک انصاف کی حکومت سے بدظن نہیں کر سکتے۔ عوام جانتے ہیں کہ کس نے ملک کو لوٹا اور کون ملک کو سیاسی بحران سے نکالنے کے لئے کوشاں ہیں۔