لاہور (ویب ڈیسک) پاکستان کے سابق مایہ ناز باﺅلر عاقب جاوید نے کہا ہے کہ ٹیسٹ کرکٹ کا کوئی مستقبل نہیں اس لئے انٹرنیشنل کرکٹ کونسل (آئی سی سی) کو اب اسے بند کر دینا چاہئے۔میڈیا سے گفتگو کرتے ہوئے عاقب جاوید نے کہا کہ 22کھلاڑیوں اور کوچنگ سٹاف کے علاوہ ٹیسٹ میچ کوئی نہیں دیکھتا۔ ٹیسٹ میچ کھیلنے والے چند ممالک کے علاوہ کوئی بھی ٹیسٹ کرکٹ میں دلچسپی نہیں رکھتا بالخصوص پاکستان جیسے ملک میں، جس کی قومی ٹیم اپنے ملک میں نہیں کھیل رہی۔ان کا کہنا تھا کہ مجھے دو سے تین ٹیموں کے علاوہ ٹیسٹ کرکٹ کا کوئی مستقبل نظر نہیں آتا جبکہ ورلڈکپ جیتنے والی پاکستانی ٹیم کے چند اہم کھلاڑیوں نے بھی فیوچر ٹورز پروگرام میں سے ٹیسٹ کرکٹ کو نکالنے کی تجویز دی تھی۔ ٹیسٹ میچ میں دلچسپی رکھنے والی ٹیموں کو مشاورت کیساتھ باہمی سیریز کھیلنی چاہئے۔