دبئی(ویب ڈیسک) ایشیا کپ کرکٹ ٹورنامنٹ میں پاک بھارت میچ کے دوران سابق صدر پرویز مشرف کی تصویر سوشل میڈیا پر وائرل ہوگئی۔ایشیا کپ کے سپر 4 مرحلے کے 23 ستمبر کو ہونے والے پاکستان اور بھارت کا اہم میچ دیکھنے سابق صدر پرویز مشرف بھی دبئی اسٹیدیم پہنچے تھے۔سابق صدر ہاتھوں میں سگار اور نیلا کوٹ پہنے پاک بھارت کرکٹ میچ سے لطف اندوز ہوتے ہوئے پائے گئے۔پرویز مشرف نے پاک بھارت کرکٹ میچ اہم بھارتی شخصیات کے ساتھ بیٹھ کر دیکھا جب کہ ان میں سے ایک اہم شخصیت راجیو شکلا نے میچ دیکھنے کی تصویر سوشل میڈیا پر پوسٹ کی جو کہ تیزی سے سوشل میڈیا پر وائرل ہورہی ہے۔یاد رہے کہ سپریم کورٹ نے سابق صدر پرویز مشرف کو این آر او عملدرآمد کیس میں پاکستان طلب کرلیا ہے جبکہ چیف جسٹس آف پاکستان کا کہنا ہے کہ پرویز مشرف ریڑھ کی ہڈی کے درد کا بہانہ کرکے نکل گئے، باہر جاکر ڈانس کرتے ہیں، ہم نے ان کا نام ای سی ایل سے نہیں ہٹایا،یہ غلط تاثر ہے۔پرویز مشرف کے وکیل اختر شاہ سے مکالمے کے دوران چیف جسٹس نے کہا ‘مجھے مشرف کی واپسی کا شیڈول بتائیں’ جس پر سابق صدر کے وکیل کا کہنا تھا پرویز مشرف بزدل نہیں ہیں، اگر ان کے آنے جانے پر پابندی نہ لگائی جائے تو وہ واپس آ سکتے ہیں۔چیف جسٹس نے کہا ‘کیا پرویز مشرف کے لیے علیحدہ قانون ہے، ایک ہفتے میں جواب دیں کہ وہ وطن واپس آ رہے ہیں یا نہیں’ جس کے بعد عدالت نے کیس کی سماعت ایک ہفتے کے لیے ملتوی کردی۔
