نئی دہلی (ویب ڈیسک)بھارتی سیاسی جماعت کانگریس کے سربراہ راہول گاندھی کو ایک بیان دینے پر عوام کی جانب سے مذاق کا نشانہ بنایا جا رہا ہے جس میں انہوں نے کہا کہ کوکا کولا کا مالک پہلے شکنجی (سکنجبین) بیچا کرتا تھا۔ راہول نے ایک جلسے سے خطاب کے دوران مواقع کی عدم دستیابی پر بات کرتے ہوئے کہا کہ ہر کوئی کوکا کولا کے متعلق جانتا ہے لیکن کیا کوئی جانتا ہے کہ اس کمپنی کا مالک کون ہے اور اس نے کس طرح کام شروع کیا، وہ امریکہ میں شکنجی (سکنجبین) بیچا کرتا تھا، اسکے پاس ٹیلنٹ اور تجربہ تھا، اس نے پیسے حاصل کئے اور کوکا کولا کمپنی شروع کی۔اسی طرح میکڈونلڈز کا مالک پہلے ایک ڈھابا چلاتا تھا اور محنت کر کے اس مقام تک پہنچا۔ ٹوئٹر پر صارفین راہول کا مذاق اڑا رہے ہیں اور مختلف کمپنیوں کے نام لیکر سوال کر رہے ہیں کہ اسکا مالک پہلے کیا کرتا تھا، ایک صارف نے ریڑھی پر سیب بیچتے ہوئے بچے کی تصویر پوسٹ کی اور لکھا کہ ایپل فون اور کمپیوٹر بیچنے والا سٹیو جابز بچپن میں گلیوں میں سیب بیچا کرتا تھا۔
