لاہور (مانیٹرنگ ڈیسک) کالم نگار میاں حبیب نے کہا ہے کہ تمام مسائل حل ہو سکتے ہیں اصل بات نیت کی ہے چینل ۵ کے پروگرام ”کالم نگار“ میں گفتگو کرتے ہوئے انہوں نے کہا کہ بدقسمتی ہے ہمارے حکمرانوں نے کالاباغ ڈیم کے مسئلے کو سیاسی نعرے کے طور پر استعمال کیا اس کو روکنے کے لئے بیرون ملک سے فنڈنگ بھی ہوتی رہی۔ پاکستان میں اربوں کا پانی ضائع ہو رہا ہے ہم بارش کا پانی بھی ضائع کرتے ہیں آنے والی نسلیں ہماری غفلت پر ہمیں کوسیں گی آپ کالا باغ ڈیم پر ریفرنڈم کرا لیں سب کچھ سامنے آ جائے گا۔ انہوں نے کہا میرے خیال میں چیف جسٹس نے پرویز مشرف کو ٹریپ کرنے کی کوشش کی ہے مشرف کا آنا آسان کام نہیں میرے خیال میں وہ واپس نہیں آئیں گے۔ کالم نگار ذوالفقار راحت نے بتایا پاکستان میں پہلی مرتبہ واٹر پالیسی بن رہی ہے اس سے قبل بنیادی ایشوز پر بات نہیں کی گئی جو افسوسناک ہے۔ افسوس قومی مفاد کے معاملات پر سیاست ہوتی ہے حالانکہ پوری دنیا میں ایسا نہیں ہوتا۔ پرویز مشرف دور میں یہ حقیقت سامنے آئی 200 سے زائد این جی اوز اور ادارے پاکستان میں کالاباغ ڈیم کے خلاف کام کر رہے ہیں۔ مسلم لیگ ن میچ فکس کرنے کے زیادہ حامی ہوتے ہیں اختلاف ان سے برداشت نہیں ہوتا۔ ریحام خان کچھ عرصہ عمران خان کے ساتھ رہیں ان کے بلیک بیری بھی ساتھ چرا کے لے گئیں اور اب ان پر الزامات لگا رہی ہیں جبکہ جمائما خان کئی سال عمران خان کے ساتھ رہیں اور دونوں کے درمیان بڑے وقار کے ساتھ علیحدگی ہوئی اور جمائما آج بھی عمران خان کا ساتھ دے رہی ہیں۔ ریحام خان نے ثابت کیا ان کے معاملات فار سیل ہیں، ریحام کسی ایجنڈے پر ہیں۔ سینئر صحافی امجد اقبال نے کہا کہ بلوچستان میں بھی بھارت فنڈنگ کرتا ہے بلوچستان میں جو شورش تھی اس پر قابو پا لیا گیا تو کیا باقی مسائل حل نہیں ہو سکتے کالا باغ ڈیم اتنا بڑا ایشو نہیں جس پر ا تفاق رائے پیدا نہ کیا جا سکے صرف قوت ارادی کی ضرورت ہے ہم نے صرف تحفظات دور کرنے ہیں تمام قیادت اکٹھی ہو اور مسئلہ حل کریں نامزد وزیراعلیٰ حسن عسکری کافی عرصہ ریڈیو پاکستان پر کام کرتے رہے وہ کسی کےخلاف نہیں وہ قانون کے مطابق چلیں گے مشرف کا آنا مشکل نہیں لیکن پھر جائیں گے کیسے۔ کالم نگار توصیف احمد خان نے کہا ہے کہ چیف جسٹس نے ایک نیا نعرہ متعارف کرایا ہے کہ پانی کو عزت دو بھارت کے ایک جنرل نے اپنے کالم میں لکھا تھا ہم نے کالا باغ ڈیم کی مخالفت کے لیے 20ارب ڈالر کی سرمایہ کاری کی ہے۔ پاکستان میں ڈیم نہ بننے میں ہمارے کچھ برادر ملک بھی شامل ہیں وہ نہیں چاہتے پاکستان میں ڈیم بنیں۔
