کراچی (شوبز ڈیسک)ہدایتکار احسن رحیم نے فلم طیفا ان ٹربل کا یورپ کا سپیل مکمل کرلیا مذکورہ سپیل میں علی ظفر ، مایا علی، جاوید شیخ ، فیصل قریشی، نئی اداکارہ ماہ نور حیدر ، فیا خان و دیگر نے پولینڈ کے شہر وارسا کی مختلف لوکیشنز پر شوٹنگ میں حصہ لیا۔مذکورہ فلم کی عکس بندی کا آغاز رواں برس کے دوران 18 فروری سے لاہور سے ہوا تھا جس کا دورانیہ 40 روز تک جاری رہا جس میں علی ظفر ، مایا علی، نیئر اعجاز ، سیمی راحیل، اسماعباس، محمود اسلم، نئے فنکاروں محرم احمد بلال اور برطانوی اداکار ٹام کولسن نے حصہ لیا۔اس حوالے سے علی ظفر کا کہنا ہے کہ فلم میں حقیقت کا رنگ بھرنے کیلئے خطرناک اسٹنٹ خود کئے اس میں کسی کی مدد نہیں لی۔ انہوں نے کہا یہ رومانس سے بھرپور مزاحیہ فلم ہے۔ مایا علی کا کہنا ہے کہ پہلی بار فلم میں کام کرنے کا تجربہ خوشگوار رہا۔علی ظفر اور ہدایتکار احسن رحیم کی مشکور ہوں کہ انہوں نے مجھے فلم میں چانس دیا۔ہدایتکار احسن رحیم کا کہنا ہے کہ مقابلے کی فضا میں اشتہاری فلموں کے ہدایتکار نے پہلی بارفیچر فلم کی ہدایات دی ہیں ،امید ہے کہ فنکاروں کی پرفارمنس اور دیگر شعبوں کی کارکردگی شائقین کو مایوس نہیں کرے گی۔
