بائیل،بگوٹا(بی این پی )سوئس لیڈیز اوپن ٹینس چیمپئن شپ میں جمہوریہ چیک کی کوالیفائر مارکیٹا ونڈروسووا نے زبردست اپ سیٹ کرتے ہوئے ٹاپ سیڈ ہم وطن حریف باربورا سٹرائیکووا کو سات،چھ اور چھ ،دو سے مات دےکر فائنل کھیلنے کا اعزاز حاصل کرلیا۔ جہاں ان کا مقابلہ آج ایسٹونیا کی انیٹ کونٹاویٹ سے ہوگا جنہوں نے سیمی فائنل میں بیلاروس کی کھلاڑی الیکسینڈرا ساسنووچ کو سخت مقابلے کے بعد چھ ،چار،چار،چھ اور سات،پانچ سے زیر کیا۔ادھر کولمبیا کے شہر بگوٹا میں جاری کلارو اوپن ٹینس ٹورنامنٹ کا فیصلہ کن معرکہ اٹلی کی فرانچسکا سکیوانے اور نمبر چار سیڈ سپینش پلیئر لارا اروابرینا کے درمیان ہوگا۔ دوسرے سیمی فائنل میں اٹلی کی فرنچسکا سکیوانے کیلئے نمبر تین سیڈ سویڈش حریف جوہانا لارسن نرم چارہ ثابت ہوئیں جب انہوں نے سات،پانچ اور چھ ،چار سے کامیابی کی بدولت فائنل میں جگہ بنا لی۔ مراکش میں جاری کنگ حسن دوئم گراں پری کے سیمی فائنل مرحلے میں جرمنی کے فلپ کولشرائبر اور کروشیا کے بورنا کورچ نے کامیابی کے بعد فائنل میں قدم رکھ دیا۔
