کراچی(خصوصی رپورٹ)ماہرین صحت نے شدید گرمی میں پانی کا زیادہ سے زیادہ استعمال کرنے ، گوشت سے پرہیز، پھل سبزیاں اور ہلکی غذا کھانے کا مشورہ دیا ہے۔ماہرین صحت نے عوام کو شدید گرمی میں انتباہ کرتے ہوئے کہا ہے شدید گرمی اورتیز دھوپ کیساتھ جسم کے درجہ حرارت میں بھی غیر معمولی اضافہ ہوجاتا ہے جس سے خون گرم ہونے لگتا ہے \اورخون میں موجود پروٹین بھی پکنے لگتے ہیں، جسم میں پانی کی کمی سے خون گاڑھا ہونے لگتا ہے جس کی وجہ سے متاثرہ افراد میں بلڈ پریشر کم ہونا شروع ہوجاتا ہے ، دماغ اور دل تک خون کی فراہمی بتدریج متاثرہونے لگتی ہے جس کی وجہ سے متاثرہ افرادکوما میں چلے جاتے ہیں جو ایک خطرناک صورتحال ہوتی ہے ۔ماہرین صحت نے بتایا کہ جسم کا درجہ حرارت بڑھنے پر اس کا کنٹرولنگ سسٹم متاثر ہونے لگتا ہے ، ایسی صورت میں متاثرہ افراد کو فوری ٹھنڈی جگہ منتقل کرنا چاہیے اور ڈراپس، پانی یا مشروبات کا فوری استعمال کرانا چاہیے ، جسم میں پانی کی کمی سے ہیٹ سٹروک لاحق ہوجاتا ہے لہذا شدید گرمی یا لوچلنے کی صورت میں پانی کا مسلسل استعمال رکھیں۔
