سیالکوٹ (ویب ڈیسک)وزیراعظم کی معاون خصوصی برائے اطلاعات و نشریات فردوس عاشق اعوان نے پاکستان پیپلز پارٹی (پی پی پی) کے چیئرمین بلاول بھٹو پر کڑی تنقید کرتے ہوئے کہا ہے کہ وزیراعظم عمران خان کو سیلکٹڈ کا طعنہ دینے والے پہلے اپنی پارٹی میں جمہوریت لے کر آئیں۔سیالکوٹ میں میڈیا سے گفتگو کرتے ہوئے انہوں نے کہا کہ ایک پرچی پر پارٹی چیئرمین بن کر سیاست میں آئے، اگر پیپلز پارٹی میں جمہوریت ہوتی تو فاطمہ بھٹو منتخب ہوتیں۔فردوس عاشق اعوان نے کہا کہ بلاول بھٹو اور آصف علی زرداری کو ذوالفقار علی بھٹو اور بے نظیر بھٹو صرف انتخابات اور ان کی برسی پر یاد آتے ہیں۔انہوں نے کہا کہ بلاول بھٹو ٹھیک کہتے ہیں کہ یہ وہ جمہوریت نہیں جس کے لیے ان کے کارکنوں نے قربانیاں دیں کیونکہ اب کریشن کے لائسنس تقسیم نہیں کیے جاتے، گٹھ جوڑ کی سیاست دم توڑ چکی ہے اور خوانچہ فرش کے بینک اکاونٹ میں رات و رات کروڑوں روپے نہیں آتے۔فردوس عاشق اعوان نے کہا کہ بلاول بھٹو نے جس جمہوریت کی تمنا کی تھی اس میں بچوں کی فکر نہیں بلکہ قوم کے بچوں کو مقروض کرنا مقصود تھا۔ان کا کہنا تھا کہ گزشتہ 10 برس میں پارلیمنٹ میں بیٹھ کر جمہوریت کے نام پر جو گٹھ جوڑ کیا اور جمہوریت کے نام پر جس طرح آمریت مسلط رہی۔معاون خصوصی نے کہا کہ ‘بلاول بھٹو جمہوریت کا راگ الاپتے ہیں جو قطعی مذاق ہے’۔واضح رہے کہ گزشتہ روز بلاول بھٹو نے پشاور میں پیپلز پارٹی کے ورکر کنونشن سے خطاب کرتے ہوئے کہا تھا کہ یہ وہ جمہوریت نہیں ہے کہ جس کے لیے ہمارے لوگوں نے کوڑے کھائے اور شہادتیں دیں۔اپنے خطاب میں پیپلز پارٹی کے چیئرمین بلاول بھٹو نے کہا تھا کہ ‘اگر آپ 2018 میں بھی صاف و شفاف انتخابات نہیں کراوسکتے تو پھر کس قسم کی جمہوریت ہے؟ سیلکٹڈ حکومت ہر محاذ پر فیل ہوچکی ہے، حکومت چلا سکتے ہیں اور نہ ہی معیشت یہاں تک کہ وہ ایک نوٹیفکیشن بھی ٹھیک سے جاری نہیں کرسکتے‘۔
‘کٹھ پتلی وزیر اعلیٰ سندھ کو آزاد کردیں’
فردوس عاشق اعوان نے کہا کہ ‘صوبہ سندھ میں جمہوریت لائیں اور وزیر اعلیٰ کو آزاد کریں جو آپ کے حکم پر کارفرما رہتے ہیں’۔انہوں نے کہا بلاول بھٹو کے اشاروں پر وزیراعلیٰ سندھ سید مراد علی شاہ نے بیمار قیدی (آصف علی زرداری) کو سرکاری ہیلی کاپٹر فراہم کیا۔ان کا کہنا تھا کہ جب آپ اپنی پارٹی اور خاندان میں جمہوریت لائیں گے تو اس کے مثبت اثرات نمایاں ہوں گے۔’کیا آپ ووٹ کو عزت دو کا نعرہ دفن کرکے جارہی ہیں؟’
علاوہ ازیں فردوس عاشق اعوان نے کہا کہ مسلم لیگ (ن) کی نائب صدر مریم نواز اپنی پارٹی اور ووٹرز کو چھوڑ کر بیرون ملک جانے کی مسلسل کوششیں کررہی ہیں۔انہوں نے سوال اٹھایا کہ ‘کیا آپ ووٹ کو عزت دو کا نعرہ دفن کر کے جارہی ہیں؟’ان کا کہنا تھا کہ ‘مسلم لیگ (ن) جب اقتدار میں ہوتی ہے تو اپنوں کا سہارا تلاش کرتی ہے اور جیسے ہی اپوزیشن نشستوں پر بیٹھتی ہے تو بیرون ملک روانہ ہونے کی کوشش کرتے ہے’۔واضح رہے کہ گزشتہ روز سابق وزیراعظم نواز شریف کی صاحبزادی مریم نواز نے ایگزٹ کنٹرول لسٹ (ای سی ایل) سے نام نکلوانے کے لیے ایک مرتبہ پھر لاہور ہائی کورٹ سے رجوع کیا تھا۔جسٹس علی باقر نجفی کی سربراہی میں لاہور ہائی کورٹ کا 2 رکنی بینچ 23 دسمبر کو مریم نواز کی درخواست پر سماعت کرے گا۔اس سے قبل مریم نواز نے 7 دسمبر کو لاہور ہائی کورٹ میں ایل سی ایل سے نام نکلوانے کی درخواست جمع کروائی تھی۔علاوہ ازیں وزیراعظم کی معاون خصوصی برائے اطلاعات و نشریات فردوس عاشق اعوان نے کہا کہ ملک میں مہنگی گیس کی فراہمی کی اصل وجہ سمجھنے کی ضرورت ہے اور جس نے مہنگی گیس خریدی وہ (شاہد خاقان عباسی) مائع قدرتی گیس (ایل این جی) کیس میں نیب کے زیر حراست ہیں۔انہوں نے کہا کہ جب مہنگی گیس خریدی گئی تو عوام کو کیسے کم قیمت میں گیس فراہم کی جاسکتی ہے۔واضح رہے کہ 18 جولائی کو نیب نے سابق وزیر پیٹرولیم شاہد خاقان عباسی کو ایل این جی کیس میں گرفتار کیا تھا۔
‘آر ایس ایس کی سوچ بے نقاب ہوگئی’
معاون خصوصی کا کہنا تھا کہ بھارت میں شہریت بل کے باعث افراتفری پھیلی ہوئی ہے اور اب تک متعدد افراد ہلاک ہوچکے ہیں تاہم بھارت میں اقلیتوں کے ساتھ غیر انسانی رویے سے لگتا ہے دو قومی نظریہ جیت گیا ہے۔انہوں نے کہا کہ قائد اعظم نے آر ایس ایس کے انتہا پسند نظریے کو بھانپ لیا تھا۔ان کا کہنا تھا کہ ‘بھارت اپنی اندرونی افراتفری سے توجہ ہٹانے کے لیے ایل او سی پر اشتعال انگیزی کررہا ہے’۔
