جنت نظیر وادی میں کرفیو کا 79واں روز ،بی جے پی رہنما کے بیٹے کا خاتون پر بیٹی سمیت شدید تشدد

اسلام آباد: (ویب ڈیسک)بھارتیہ جنتا پارٹی (بی جے پی) کے رہنما چودھری چگار سنگھ کے بیٹے نوین چودھری نے مقبوضہ رہاست جموں و کشمیر کے ضلع کٹھوعہ میں خاتون کو بیٹی سمیت شدید تشدد کا نشانہ بنا ڈالا۔رپورٹ کے مطابق نوین چودھری نے خاتون اور ان کی بیٹی کو دکان سے گھسیٹ کر باہر نکالا اور لوہے کی راڈ سے تشدد کیا جس سے دونوں خواتین شدید زخمی ہوگئیں۔دوسری جانب حریت اور مزاحمتی قیادت کی جانب سے کشمیر کی گلیوں میں پوسٹرز آویزاں کردیے گئے ہیں جن پر تحریر ہے کہ کشمیری کبھی اجازت نہیں دیں گے کہ ان کے سامنے جنت نظیر وادی کو پامال کیا جائے۔آج جنت نظیر وادی میں کرفیو کا 79واں روز ہے، غم اور صدمے سے نڈھال کشمیری عوام کی زندگیوں میں سکون ناپید ہو چکا ہے اور طویل پابندیوں کے باعث کاروباری مراکز کو تالے لگ چکے ہیں۔عوام پر ڈھائے جانے والے مظالم کی انتہا یہی نہیں ہے بلکہ مودی سرکار کشمیر میں سیاسی قیدیوں کو رہا کرنے کے لیے ایک بانڈ پر دستخط بھی کرا رہی ہے، بانڈ کے تحت رہائی پانے والے قیدی آرٹیکل تین سو ستر سمیت کشمیر کے حالیہ حالات پر کوئی تبصرہ نہیں کریں ?گے۔