لاہور (مانیٹرنگ ڈیسک) سابق پراسیکیوٹر نیب راجہ عامر عباس نے کہا کہ پاکستان اور افریقی ممالک میں احتساب کا موثر نظام نہ ہونے کی وجہ سے سیاستدان لوٹ مار کرتے ہیں ادارے کمزور ہیں بڑے مجرموں پر ہاتھ ڈالنے سے کتراتے ہیں۔ سپریم کورٹ میں آج ہباز شریف ضمانت کے خلاف کیس لگا تو نیب پراسیکیوٹر نے تیاری نہ ہونے کا کہہ کر تاریخ لے لی جس پر عدالت نے کہا کہ جب نیب ہی دلچسپی نہیں لے رہا تو ہمیں کیا جلدی ہے اور کیس کو سائڈ پر پھینک دیا۔ ملک میں افراتفری کا ماحول ہے کوئی ادارہ مضبوطی اور مستقل مزاجی سے کام نہیں کر رہا۔ ایک ہی طرح کے کیسز میں ہائیکورٹس مختلف فیصلے دے رہی ہیں۔ ایف بی آر کام نہیں کر رہا، سٹیٹ بنک گورنر اس کو لگا دیا جس پر مختلف الزامات ہیں۔ 8 ماہ میں اداروں میں بہتری آنے کے بجائے مزید کوتاہی نظر آتی ہے۔ پارلیمنٹ کی کارکردگی صرف اتنی ہے کہ پنجاب پارلیمنٹ نے اپنی تنخواہوں کا بل پاس کیا کوئی قانون سازی نہیں ہو رہی۔ تینوں بڑی سیاسی جماعتوں میں زیادہ تر پرانے لوگ ہیں جو نظام کی کمزوری سے فائدہ اٹھاتے ہیں یہ لوگ کیوں قانون سازی کریں یا نظام کو مضبوط بنائیں گے۔ معاشی صورتحال خراب ہے۔ عمران خان اور اسٹیبلشمنٹ کو ان مسائل پر سوچنا چاہئے۔ وزیراعظم تمام حقائق پر قوم کو اعتماد میں لیں اور مشاورت کریں۔ چیف جسٹس نے عام جرائم کے لئے ماڈل عدالتیں بنائیں، بڑے احتساب کیسز کیلئے بھی ماڈل عدالتیں بنائیں کہ ان بڑے مجرموں کو سزا دی جا سکے۔
