فیصل آباد (یونس چوہدری سے) فیصل آباد کے نواحی علاقہ”پینسرہ میں جنگل کا قانون“، ٹھیکری والا پولیس کی انتہائی نااہلی کے باعث پینسرہ کا علاقہ غیر بن گیا۔ پولیس ٹونی ڈکیت گینگ کے سامنے بے بس، ٹونی ڈکیت گروہ کی نوجوان پر سر بازار تشدد کیے جانے کی ایک اور ویڈیو منظر عام پر آ گئی۔ شہری پر سر عام ”تشدد کی دوسری ویڈیو فوٹیج خبریں نے حاصل کر لی“۔دونوں ویڈیو منظر عام پر آنے سے چک نمبر 275ج ب اور ملحقہ دیہاتوں میں خوف و ہراس پھیل گیا۔ تفصیل کے مطابق پینسرہ میں وسیم تشدد کیس کا مرکزی ملزم اکرام عرف ٹونی اور اس کے ساتھی بےگناہ شہریوں پر تشدد کرنے کے عادی نکلے۔ اس گروہ کے نوجوان پر بےہمانہ تشدد کرنے کی ایک اور ویڈیو سامنے آ گئی ہے۔ جس میں اکرام عرف ٹونی اور اس کے ساتھی نامعلوم نوجوان پر ہنٹر سے تشدد کرتے دیکھے جا سکتے ہیں اور اس کو کپڑے اتار کر برہنہ ہونے پر مجبور کرتے رہے۔ زبردستی کپڑے اتارنے کی کوشش کی۔ نوجوان ان کے سامنے ہاتھ جور کر معافیاں مانگتا ہوا اللہ اور رسول کے واسطے دیتا رہا۔ مگر ظالموں کو ترس نہ آیا اور اسے غلیظ گالیاں دیتے رہے اور تشدد کی ویڈیو نیٹ پر ڈالنے کی دھمکیاں دیں اور اس پر جوتے برساتے رہے۔ مگر متاثرہ نوجوان کا بڑا بھائی اپنے چھوٹے بھائی پر ہونےوالے ظلم و تشدد کا بڑی بے بسی سے تماشہ دیکھتا رہا۔ یہاں یہ امر قابل ذکر ہے کہ چند یوم قبل بھی اکرام عرف ٹونی گینگ کی پینسرہ کے علاقہ چک نمبر 275ج ب کے رہائشی حنیف کے بیٹے وسیم پر وحشیانہ تشدد کرنے کی ویڈیو منظر عام پر آئی تھی جس کے بعد فیصل آباد پولیس حرکت میں آئی تھی۔ تاخیر سے تشدد کیس کا مقدمہ درج کر کے دو ملزمان کو گرفتار کیا گیا تھا۔ جس کے بعد ٹونی ڈکیت گینگ کی ایک اور نوجوان پر بےہمانہ تشدد کرنے کی ویڈیو سامنے آ گئی ہے۔ جس کے منظر عام پر آنے سے پینسرہ کے دیہاتوں کے لوگ سخت خوف زدہ ہو گئے ہیں۔ مگر تھانہ ٹھیکریوالہ کا ایس ایچ او اور اس کے ماتحت ٹونی ڈکیت گینگ کے سامنے بے بس نظر آتے ہیں۔ بلکہ شہریوں نے ڈکیت گروہ کی پولیس سے ساز باز قرار دےدیا۔ پینسرہ میں کہیں بھی قانون پر عملدرآمد دکھائی نہیں دیتا۔ پینسرہ علاقہ میں جنگل کا قانون نافذ ہے۔ اس امر پر شہریوں، سماجی و مذہبی حلقوں نے انسانیت سوز واقعات پر شدید احتجاج کرتے ہوئے وزیراعظم، چیف جسٹس آف پاکستان، وزیراعلیٰ پنجاب، آئی جی پنجاب، وفاقی و صوبائی وزیر قانون، آر پی او اور سی پی او فیصل آباد سے فوری نوٹس لےکر ٹونی گینگ کے ارکان کے خلاف مقدمات درج و گرفتار کر کے کیفر کردار تک پہنچانے کا مطالبہ کیا ہے۔
