ذکی بشیر گل احمد کے نئے چیف ایگزیکٹو آفیسر مقرر

ملک کی سب سے بڑی ٹیکسٹائل ملوں میں سے ایک گل احمد ٹیکسٹائل ملز لمیٹڈ (جی اے ٹی ایم) نے محمد ذکی بشیر کو اپنا چیف ایگزیکٹو آفیسر (سی ای او) مقرر کردیا ہے۔

لسٹڈ کمپنی نے بدھ کو اسٹاک ایکسچینج کو بھیجے گئے اپنے نوٹس میں اس پیشرفت سے آگاہ کیا۔

اعلامیہ کے مطابق ہم آپ کو مطلع کرتے ہیں کہ کمپنی کے بورڈ آف ڈائریکٹرز نے کمپنی کے ڈائریکٹر محمد ذکی بشیر کو یکم اپریل 2026 سے کمپنی کا چیف ایگزیکٹو آفیسر (سی ای او) مقرر کردیا ہے۔

گل احمد ٹیکسٹائل ملز لمیٹڈ (جی اے ٹی ایم) کی ویب سائٹ پر دستیاب معلومات کے مطابق ذکی بشیر نے 2005 میں کمپنی میں شمولیت اختیار کی اور بعد ازاں 2008 میں بورڈ آف ڈائریکٹرز کا حصہ بنے۔ انہوں نے ریجنٹس بزنس اسکول، برطانیہ (یو کے) سے انٹرنیشنل بزنس میں گریجویٹ ڈگری حاصل کر رکھی ہے اور وہ پاکستان انسٹیٹیوٹ آف کارپوریٹ گورننس (پی آئی سی جی) سے ایک سرٹیفائیڈ ڈائریکٹر بھی ہیں۔

ذکی بشیر آل پاکستان ٹیکسٹائل ملز ایسوسی ایشن (اپٹما) کی ایگزیکٹو کمیٹی کے رکن ہیں۔ وہ 2014 سے انٹرپرینیورز آرگنائزیشن کے بھی رکن رہے ہیں۔ اس کے علاوہ وہ پاکستان ٹیکسٹائل کونسل کے ممبر ہیں اور اس کے بورڈ میں بطور ڈائریکٹر خدمات انجام دے رہے ہیں۔ وہ ینگ پریذیڈنٹ آرگنائزیشن پاکستان کے بھی رکن ہیں۔