- ایران سے بات چیت جاری ہے اور مثبت پیش رفت ہو رہی ہے، وائٹ ہائوسامریکی صدر ڈونلڈ ٹرمپ ایران کے خلاف جاری جنگ کے اخراجات کے لیے عرب ممالک سے مالی تعاون حاصل کرنے میں دلچسپی رکھتے ہیں، وائٹ ہاؤس کی پریس سیکریٹری کیرولین لیوٹ نے پیر کو صحافیوں کو بتایا۔ انہوں نے کہا کہ صدر اس معاملے پر مزید بات کر سکتے ہیں اور یہ ایک ایسا خیال ہے جس پر وہ غور کر رہے ہیں۔
ایک نیوز بریفنگ کے دوران جب ان سے پوچھا گیا کہ کیا عرب ممالک جنگ کے اخراجات میں حصہ ڈالیں گے تو کیرولین لیوٹ نے کہا کہ وہ صدر سے پہلے کوئی بات نہیں کرنا چاہتیں، تاہم یہ ایک ایسا آپشن ہے جس میں ٹرمپ دلچسپی رکھتے ہیں۔ ان کے مطابق صدر عرب ممالک سے اس حوالے سے بات کرنے کے خواہاں ہو سکتے ہیں۔
کیرولن لیوٹ نے ایران کے ساتھ جاری مذاکرات کے حوالے سے بتایا کہ بات چیت جاری ہے اور مثبت پیش رفت ہو رہی ہے۔ انہوں نے کہا کہ ایران عوامی سطح پر جو مؤقف اختیار کرتا ہے وہ نجی سطح پر امریکی حکام کو دی جانے والی معلومات سے مختلف ہوتا ہے، اور تہران نے نجی طور پر واشنگٹن کے بعض نکات سے اتفاق بھی کیا ہے۔
انہوں نے خبردار کیا کہ ایران کی جانب سے نجی سطح پر دی گئی یقین دہانیوں کو پرکھا جائے گا اور امریکہ اس بات کو یقینی بنائے گا کہ ایران اپنے وعدوں کی پاسداری کرے۔
اس سے قبل صدر ٹرمپ نے ایران کو خبردار کیا تھا کہ اگر اس نے آبنائے ہرمز کو نہ کھولا تو اس کے توانائی کے پلانٹس اور تیل کے کنوؤں کو تباہ کر دیا جائے گا۔ یہ بیان اس وقت سامنے آیا جب ایران نے امریکی امن تجاویز کو غیر حقیقت پسندانہ قرار دیا اور اسرائیل پر میزائل حملے کیے۔
