اس حوالے سے وزیر بلدیات ذیشان رفیق کو پنجاب رورل میونسپل سروسز کمپنی کی جانب سے تفصیلی بریفنگ دی گئی، جس میں سپیشل سیکرٹری آسیہ گل اور پی آر ایم ایس سی کے سی ای او خرم پرویز نے شرکت کی، جبکہ وزیراعلیٰ آفس کے سیکرٹری کوآرڈینیشن ویڈیو لنک کے ذریعے اجلاس میں شریک ہوئے۔
بریفنگ کے دوران بتایا گیا کہ وزیراعلیٰ کی جانب سے ابتدائی طور پر 485 دیہات میں ترقیاتی سکیموں کی منظوری دی گئی تھی، جن میں سے 464 دیہات کے منصوبوں کی منظوری ڈسٹرکٹ ڈویلپمنٹ کمیٹیوں سے حاصل ہو چکی ہے۔
اس کے علاوہ 357 دیہات کے لیے ورک ایوارڈ جاری کیے جا چکے ہیں، جبکہ 302 دیہات میں کنٹریکٹرز نے عملی طور پر کام سنبھال لیا ہے۔
وزیر بلدیات نے پروگرام کی مؤثر نگرانی کے لیے ڈیش بورڈ بنانے کی ہدایت دیتے ہوئے کہا کہ صوبے کے تقریباً 22 ہزار 986 دیہات میں 41 ہزار سے زائد چھپڑ موجود ہیں، جن کی بحالی کے ساتھ واٹر ٹریٹمنٹ پلانٹس بھی نصب کیے جائیں گے۔
انہوں نے مزید کہا کہ گلیوں، ڈرینج سسٹم اور پارکس کی بہتری کے ساتھ 200 دیہات میں واٹر سپلائی سکیمیں بھی فراہم کی جائیں گی۔ اجلاس میں چھپڑوں کی زمین پر قائم تجاوزات کے خاتمے کے لیے خصوصی مہم چلانے کا فیصلہ بھی کیا گیا۔
ذیشان رفیق نے متعلقہ ڈپٹی کمشنرز کو تجاوزات ہٹانے کا ٹاسک سونپنے کی ہدایت کرتے ہوئے اب تک کی پیشرفت پر اطمینان کا اظہار کیا اور منصوبوں میں شفافیت کو یقینی بنانے پر زور دیا۔
