حوالہ ہنڈی اور غیر قانونی کرنسی ایکسچینج میں ملوث عناصر کے خلاف کریک ڈاؤن جاری ہے، مجموعی طور پر 4 ارب 28 کروڑ روپے سے زائد مالیت کی ملکی و غیر ملکی کرنسی برآمد کی گئی۔
ایف آئی اے کا غیر قانونی کرنسی ایکسچینج میں ملوث عناصر کے خلاف ملک گیر کریک ڈاؤن جاری رہا۔
رواں سال کے دوران حوالہ ہنڈی اور کرنسی کی غیر قانونی ایکسچینج میں ملوث عناصر کے خلاف 499 چھاپہ مار کاروائیاں کیں، 500 مقدمات درج کر کے 711 ملزمان کو گرفتار کیا گیا جبکہ 61 انکوئریوں کی تفتیش بھی مکمل کی گئی۔
رواں سال کے دوران خیبرپختونخوا زون نے 333، لاہور زون نے 79، گجرانوالہ زون نے 24، فیصل آباد زون نے 67 اور ملتان زون نے 53 ملزمان کو گرفتار کیا۔
اسلام آباد زون نے 26، کراچی زون نے 77، حیدرآباد زون نے 32 اور بلوچستان زون نے 20 ملزمان کو گرفتار کیا جبکہ گرفتار ملزمان بغیر لائسنس کرنسی کی ایکسچینج میں ملوث تھے۔
ترجمان ایف آئی اے کے مطابق رواں سال چھاپوں کے دوران مجموعی طور پر 4 ارب 28 کروڑ روپے سے زائد مالیت کی ملکی اور غیر ملکی کرنسی برآمد کی گئی۔
برآمد کی گئی کرنسی میں 799060 امریکی ڈالر، 38 کروڑ روپے سے زائد مالیت کی دیگر غیر ملکی کرنسی شامل برآمد کی گئی جبکہ برآمد شدہ کرنسی میں 3 ارب 67 کروڑ سے زائد پاکستانی روپے بھی شامل ہیں
ملک گیر چھاپوں کے دوران 28 سے زائد پلازوں، مارکیٹوں اور دکانوں کو بھی سیل کیا گیا۔
