کنشاسا : (ویب ڈیسک) شمال مشرقی جمہوری جمہوریہ کانگو ( ڈی آر سی ) میں نقل مکانی کرنے والے افراد کے کیمپ پر حملے میں 45 سے زائد افراد ہلاک ہو گئے۔
غیر ملکی خبر رساں ادارے کے مطابق اقوام متحدہ کے امن مشن کا کہنا ہے کہ کوآپریٹو فار ڈیویلپمنٹ آف کانگو ( کوڈیکو ) نامی ملیشیا گروپوں کے اتحاد سے تعلق رکھنے والے جنگجوؤں نے اس حملے کا ارتکاب کیا ہے۔
اقوام متحدہ کے امن مشن نے متاثرین کے اہل خانہ سے تعزیت کا اظہار کیا اور زخمیوں کی جلد صحت یابی کے لئے دعا کی۔
امن مشن کی جانب سے جاری بیان میں کہا گیا ہے کہ یہ حملہ بین الاقوامی انسانی قانون کی سنگین خلاف ورزی ہے اور امن مشن یہ یاد دلانا چاہتا ہے کہ شہری آبادی کے خلاف جان بوجھ کر حملے جنگی جرائم کا حصہ بن سکتے ہیں۔
سول سوسائٹی کے نمائندے نے بتایا کہ حملہ آوروں نے اندھا دھند فائرنگ کی اور بہت سے لوگوں کو ان کے گھروں میں جلا ڈالا۔
رپورٹس کے مطابق مقامی لوگوں نے بتایا کہ حملے کے نتیجے میں جاں بحق ہونے والے افراد کو اجتماعی قبر میں دفنایا گیا۔
ڈی آر کانگو میں افریقہ میں نقل مکانی کرنے والوں کی سب سے زیادہ آبادی ہے، اقوام متحدہ کے اندازے کے مطابق کم از کم 5.6 ملین افراد لڑائی کی وجہ سے اپنے گھر بار چھوڑ چکے ہیں۔
اقوام متحدہ کے دفتر برائے رابطہ برائے انسانی امور نے اپنی تازہ ترین رپورٹ میں کہا کہ ارد گرد کے علاقوں میں مسلح تشدد کی وجہ سے 15 اپریل سے 15 مئی کے درمیان تقریباً 70,000 بے گھر افراد یہاں پہنچے۔
پچھلے ہفتے کوڈیکو کے جنگجوؤں نے فوجی تنصیب پر حملہ کیا تھا جس میں کم از کم سات شہری مارے گئے تھے۔
