لاہور: (ویب ڈیسک) انٹرنیشنل کرکٹ کونسل (آئی سی سی) نے پلیئرز کی نئی رینکنگ جاری کردی۔
ٹی 20 بیٹرز رینکنگ
ٹی 20 بیٹرز کی رینکنگ میں بھارت کے سوریا کمار یادیو بدستور پہلے نمبر پر موجود ہیں جبکہ پاکستان کے محمد رضوان کا دوسرا اور کپتان بابراعظم کا تیسرا نمبر برقرار ہے۔
جنوبی افریقا کے رائیلی روسو پانچویں نمبر پر آگئے اور نیوزی لینڈ کے ڈیون کانوے چھٹے نمبر پر چلے گئے۔
ٹی 20 بیٹرز کی رینکنگ میں قومی کرکٹر افتخار احمد 10 درجے ترقی کے بعد 44 ویں نمبر پر آگئے ہیں۔
ٹی 20 باؤلرز رینکنگ
ٹی 20 باؤلرز کی رینکنگ میں افغانستان کے راشد خان کا پہلا نمبر برقرار ہے، قومی ٹیم کے سٹار فاسٹ باؤلر حارث رؤف 5 درجے ترقی کے بعد 11 نمبر پر موجود ہیں۔
پاکستان کے شاداب خان رینکنگ میں 13 ویں نمبر پر موجود ہیں اور شاہین آفریدی ایک درجے ترقی کے بعد 15 ویں نمبر پر آگئے ہیں۔
نیوزی لینڈ کے ایش سودھی پانچ درجے ترقی کے بعد 16 ویں نمبر پر آگئے، ٹی 20 آل راؤنڈرز میں بنگلادیش کے شکیب الحسن کا پہلا نمبر ہے۔
آئی سی سی ٹیسٹ پلیئرز رینکنگ
ٹیسٹ پلیئرز رینکنگ میں آسٹریلیا کے مارنس لبوشین کا پہلا نمبر برقرار ہے، پاکستان کے بابراعظم رینکنگ میں پانچویں نمبر پر موجود ہیں، سری لنکا کے دیموتھ کرونارتنے ایک درجے ترقی کے بعد نویں نمبر پرآ گئے ہیں، سری لنکا کے دنیش چندیمل نے 4 درجے ترقی کے بعد 14 ویں پوزیشن پر قبضہ جما لیا ہے۔
ٹیسٹ باؤلرز رینکنگ
باؤلرز کی ٹیسٹ رینکنگ میں بھارت کے روی چندرن ایشون کا پہلا نمبر برقرار ہے، سری لنکا کے پرابتھ جے سوریا 13 درجے ترقی کے بعد 19 ویں نمبر پر آگئے، آئی لینڈرز کے ہی باؤلر رمیش مینڈس 3 درجے ترقی کے بعد 32 ویں نمبر پر آ گئے ہیں، ٹیسٹ آل راؤنڈرز میں بھارت کے رویندرا جڈیجا کا پہلا نمبر ہے۔
